Category Archives: කාලීන

ආණ්ඩුක්‍රම ව්‍යවස්ථා සංශෝධනය සඳහා මහජන යෝජනා ලබාගැනීම – වර්ශ 2016

ගරු සභාපතිතුමනි,

ව්‍යවස්ථා සංශෝධනය සඳහා මගේ යෝජනාව නම්, මැතිවරණ ක්‍රමය සංශෝධනය නොකර සමානුපාතික නියෝජන ක්‍රමය දිගට ම පවත්වාගෙන යන ලෙස ඉල්ලීමයි.

ඊට හේතුව නම් පැවති කේවල මැතිවරණ කොට්ඨාශ ක්‍රමය , ප්‍රකාශිත මහජන මතය විකෘති කරන සාවද්‍ය මැතිවරණ ක්‍රමයක් වීමයි. එය වන්නේ කෙසේදැයි පෙන්වීම සඳහා ඉහත සඳහන් වගුව දෙස ඔබතුමා ගේ කාරුණික අවධානය යොමු කරමි. එහි 1947 සිට 2015 දක්වා මෙරට පැවති මහ මැතිවරණ වල අවසාන ප්‍රතිඵල සාරාංශගත කොට දක්වා ඇත. පැහැදිලි බව උදෙසා මෙහිදී ප්‍රධාන පක්ෂ දෙකෙහි ප්‍රතිපල පමණක් දක්වා ඇති අතර එය මාගේ තර්කය ගොඩනැංවීමට භාදාවක් නොවේ. 1947 දී පැවති පළමු මැතිවරණයට ශ්‍රී ලංකා නිදහස් පක්ෂය කරඟ නොකළ බැවින් මෙහිදී එම මැතිවරණය නොසළකා ඇත. ප්‍රධාන පක්ෂ දෙක වෙනත් පක්ෂ සමඟ සංධානගතව මැතිවරණ වලට ඉදිරිපත් වූ අවස්ථා වලදී ද ප්‍රධාන පක්ෂයේ නම යටතේ ප්‍රතිපලය දක්වා ඇත. 

Capture1

  (වගු අංක 1)

මෙම කාලය තුල මෙරට පැවති මහ මැතිවරණ 15 අතරින් පළමු 8 කේවල කොට්ඨාශ ක්‍රමය යටතේ ද අවසාන 7 සමානුපාතික නියෝජන ක්‍රමය යටතේ ද පවත්වා ඇත. මේ වගුව තුලින් ඉදිරිපත් වන කරුණු පිලිබඳ පැහැදිලි නිරීක්ෂණයන් පහත පරිදිවේ.

  1. 9 සිට 15 දක්වා මැතිවරණ වලදී එක් එක් දේශපාලන පක්ෂය ජාතික වශයෙන් ලබාගත් ඡන්ද ප්‍රතිශතය හා ඔවුන් ගේ පාර්ලිමේන්තු නියෝජනය සමානය ; නොගැලපීමක් නැත .
  2. 2 සිට 8 දක්වා මැතිවරණ වල වලදී එක් එක් පක්ෂය ජාතික වශයෙන් ලබාගත් ඡන්ද ප්‍රතිශතය හා ඔවුන් ගේ පාර්ලිමේන්තු නියෝජනය අසමානය ; කිසිදු ගැලපීමක් නැත .

උදා : 1956 දී 40% ක් ඡන්ද ලැබූ ශ්‍රී ලංකා නිදහස් පක්ෂයේ පාර්ලිමේන්තු නියෝජනය 54% ක් වේ : නමුත් 28% ඡන්ද ලැබූ එක්සත් ජාතික පක්ෂයේ පාර්ලිමේන්තු නියෝජනය 8% කට සීමාවේ . එමෙන්ම

1977 දී 51% ක් ඡන්ද ලැබූ එක්සත් ජාතික පක්ෂයේ පාර්ලිමේන්තු නියෝජනය 83% වේ : නමුත් 30% ඡන්ද ලැබූ ශ්‍රී ලංකා නිදහස් පක්ෂයේ පාර්ලිමේන්තු නියෝජනය 5% කට සීමාවේ .

  1. අංක 5 යටෙත් ඇති 1960 ජූලි මහ මැතිවරණය දෙස අවධානය යොමු කරන්න. එහි ජයග්‍රහණය හිමිව ඇත්තේ දිවයිනේ වැඩි ඡන්ද ප්‍රතිශතයක් (37% ක්) ලැබූ එක්සත් ජාතික පක්ෂය නොව අඩු ඡන්ද ප්‍රතිශතයක් (33% ක්) පමණක් ලැබූ ශ්‍රී ලංකා නිදහස් පක්ෂය යි. මෙය මහජන මතය බරපතල ලෙස විකෘති වී උඩු යටිකුරු වී යාමකි.
  2. අංක 7 යටෙත් ඇති 1970 මහ මැතිවරණය දෙස අවධානය යොමු කරන්න. එහිදී ද ජයග්‍රහණය හිමිව ඇත්තේ දිවයිනේ වැඩි ඡන්ද ප්‍රතිශතයක් (38% ක්) ලැබූ එක්සත් ජාතික පක්ෂය නොව අඩු ඡන්ද ප්‍රතිශතයක් (37% ක්) ලැබූ ශ්‍රී ලංකා නිදහස් පක්ෂය යි. මෙය ද මහජන මතය බරපතල ලෙස විකෘති වී උඩු යටිකුරු වී යාමකි.

මෙවන් විකෘති සහගත ප්‍රතිපල ලැබීම වැලැක්වීමට නම් සිදු කළ යුත්තේ සියලුම මැතිවරණ (පාර්ලිමේන්තු, පලාත් සභා, පලාත් පාලන ආයතන) වර්තමාන සමානුපාතික නියෝජන ක්‍රමය යටතේම පැවැත්වීමට කටයුතු යෙදීම විනා මැතිවරණ ක්‍රමය සංශෝධනය කර පැරණි කේවල කොට්ඨාශ ක්‍රමය ගෙන ඒම නොවේ.

ඉහත මැතිවරණ ප්‍රතිපල වල ම සවිස්තරාත්මක ඉදිරිපත් කිරීමක් පහත වගුවේ දක්වා ඇත.

Capture

 

උදාවන්නේ ගෙම්බන් ගේ යුගය ද? – Frog’s era, is it ?

 

Forecast 2015 GE

2015 ජනවාරි 08 වනදා පැවති ජනාධිපතිවරණය මහ මැතිවරණයක් වූයේ නම් එහි ප්‍රතිපලය ඉහත ආකාරවේ. අගෝස්තු 17 වනදා පැවැත්වීමට නියමිත මහ මැතිවරණයේ ප්‍රතිපල ද මෙසේ හෝ මීට ආසන්න එකක් වීමට හොදටම ඉඩ ඇත. මේ අනුව ප්‍රධාන පක්ෂ දෙකට ම බහුතර බලයක් පාර්ලිමේන්තුව තුල හිමි නොවීමට ඇති ඉඩ කඩ වැඩිය. රනිල් වික්‍රමසිංහ මහතා ජාතික ආණ්ඩුවක් ගැන නිතර පවසන්නේ මේ ගැන ඔහු ද හොදින් දන්නා නිසාය. මේ ප්‍රතිපලය තුලින් ආණ්ඩුවක් පිහිටුවීමට නම් බහුතරයට ඇති මදිපාඩුව කෙසේ හෝ පිරිමසා ගත යුතුය. එයට ඇති හොඳ ම විකල්පය ප්‍රධාන විපක්ෂයෙන් මංත්‍රී වරු කීපදෙනෙක් බිලිබාගැනීමය. ජාතික ආණුඩුවක් සෑදීමට දායක වූවා යන උදාන වාක්‍යය කියමින් ගෙම්බන් රැලක් කැබිනට් ඇමති/ කැබිනට් නොවන ඇමති/ ව්‍යාපෘති ඇමති/ රාජ්‍යය ඇමති/නියෝජ්‍ය ඇමති නැතහොත් පසුගිය පාර්ලිමේනුත්වේ මෙන් ජ්‍යේෂ්ඨ ඇමති ධූර ලබා ආණ්ඩු පක්ෂයේ වාඩි වනු ඇත. (මැතිවරණ ප්‍රතිපලය කුමක් වුව ද අනිවාර්යයෙන්ම අනෙක් පක්ෂය ද මෙයම කිරීමට යත්න දරනු ඇත.)
යහ පාලනයක් උදෙසා කළ යුතුව තිබුණේ, 20 වන සංශෝධනය හරහා කේවල කොට්ඨාස ක්‍රමය නැවත ගෙනවිත් තම නියෝජිතයන් තෝරා ගැනීමට ඇති නිදහස සීමා කිරීම නොව පත්වන මංත්‍රීවරුනට තම ඡන්දදායකයන් පාවාදී පැති මාරු කිරීමට ඇති ඉඩ නැතිකිරීමය. පක්ෂ මාරු කරන්නේ නම් මංත්‍රීධූරය අහිමි වන අන්දමට නව නීති සම්පාදනය කිරීමය. මුදල් කුට්ටි වෙනුවෙන් ආත්මය පාවාදී  හා ඡන්දදායකයන් වෙන්දේසි කිරීමේ නිර්ලජ්ජිත සම්ප්‍රදාය අවසන් කිරීමය.
අගෝස්තු 18 වනදායින් පසුව මෙරට ඡන්ද දායකයන්ට සර්කස් ද බලිටි ද හිටි පිනුම් ද බඩ පිනුම් ද දක්නට නොලැබේ යයි ඉත සිතින් ම ප්‍රාර්ථන‍ා කරමු. තමන් නියෝජනය කරන මතවාදය වෙනුවෙන් සෘජුව පෙනී සිටීමට තරම් ශක්තිමත් කෂේරුවක් ඇති නියෝජිතයන් පාර්ලිමේනුතුවට තෝරා යැවීමට ඡන්නදායකයන්ට ශක්කිය ධෛර්ය ලැබේවා!

විසිවන සංශෝධනයෙන් විසිවන ජනමතය – That is not your business man!

ග්‍රීසියේ ඇතෑන්ස්, ස්පාටා, කොරින්ත්, ආර්කේඩියා වල රැස්වූ ජනතාව තමන්ට බලපාන පොදු ප්‍රශ්නවලට විසඳුම් සෙව්වේ සාකච්චා මාර්ගයෙනි. මෙලෙස සියලුම ජනතාව ගේ අදහස් සාකච්චාට භාජනය වී තීරණ ගැනීමේ සහ පාලනය කිරීමේ මෙම ක්‍රියාවලිය ප්‍රජාතන්ත්‍රවාදී පාලන ක්‍රමයේ මුල් අවස්ථාව ලෙස සැලකූ අතර කාලයාගේ ඈවෑමෙන් මෙය විවිධ වෙනස්කම් වලට ලක්වෙමින් අද දක්වා ම ලොව පුරා ව්‍යාප්තව පවතියි. නමුත් එදා ට සාපේක්ෂව ජනගහණය අධික වීම නිසා තීරණ ගැනීමේ ක්‍රියාවලියට සියලුම ජනතාව සහභාගීවීම ප්‍රාෙයා්ගිකව සිදු කළ නොහැකි බැවින් වර්තමානයේ සිදුවන්නේ ජනතාව තමන්වෙනුවෙන් තීරණ ගැනීම උදෙසා තම නියෝජිතයන් පත් කිරීමයි. මෙය “නියෝජිත ප්‍රජාතන්ත්‍රවාදය“ ලෙස හඳුන්වනු ලබන අතර අප රට් ද ක්‍රියාත්මක වනුයේ මෙය බව සියලුදෙනාම පාහේ දනී. පාර්ලිමේන්තුවේදී තමන්වෙනුවෙන් තීරණ ගන්නා නියෝජිතයන් තෝරා ගැනීම පිලිබඳ ක්‍රමවේදයේ සුවිශේෂී වෙනස්කමක් කිරීමට ඊයේ (2015 ජූනි 11) මෙරට කැබිනට් මණ්ඩලයේ අනුමැතිය හිමි විය. ඒ පවතින සමානුපාතික නියෝජන ක්‍රමය වෙනුවට “කේවල ඡන්ද කොට්ඨාශ“ (First Pass the Post) ක්‍රමය යලි ස්ථාපනය කිරීමයි. මේ පිළිබඳ විකල්ප මතවාදයක් සාකච්චා කිරීමට මෙයින් ඉඩ හසර වෙන් කර ගනිමු.

මෙය අංක ගණිතමය වශයෙන් ජනමතය නිවැරදිව ප්‍රකාශකර ක්‍රමයක් නොවන බව මුලින්ම කිව යුතු අතර ඒ ගැන කතිකාවන් මේ වේදිකාව තුල උදාහරණ සහිතව මීට පෙර සිදු කර ඇත. ඒ සඳහා හිතාදර පාඨක ඔබට පහත ලින්ක් ඔස්සේ පිවිසීමට ඇරැයුම් කරමි.

20 වන සංශෝධනය හරහා පැරණි කේවල කොට්ඨාශ ක්‍රමය යලි ස්ථාපනය කිරීමට මෙරට ජනතා බලවේග ක්‍රියාත්මක වන්නට වූයේ සද්භාවයෙන් බවට තර්කයක් නැත. වෙසෙසින්ම මනාප ක්‍රමය හරහා බිහිව ඇති ප්‍රචන්ඩකාරී, දූෂිත දේශපාලන අප සංස්කෘතිය ආපසු හරවා නිවැරදි කිරීමට මේ හරහා ඉඩ ලැබෙතැයි යන්න ඔවුන්ගේ අපේක්ෂාවයි. අධ්‍යයන පොදු සහතික පත්‍ර සාමාන්‍ය පෙල වත් සමත් නැති දූෂිත දේශපාලකයන් දේශපාලන බිමෙන් අතුගා දමා අතීතයේ මෙන් උගත් – බුද්ධිමත් නියෝජිතයන්ගෙන් පාර්ලිමේන්තුව පිරවීමට මේ හරහා හැකිවෙතැයි යන්න ජනතාව අපේක්ෂාකරන වෙනසයි. නමුත් ඉතාම පැහැදිලි වශයෙන් මෙය මිරිඟුවකි. කිසිඳා සැබෑ නොවන සිහිනයක් ම පමණකි.

ඊට වඩා භයානක තත්වය වන්නේ ඡන්දදායකයාගේ අතපය බැඳ දමන මේ ක්‍රමය, (සාපේක්ෂව) යහපත් නියෝජිතයන් පත්කරයැවීමට ඡන්දදායකයාට දැනට ඇති සීමිත ඉඩකඩ ද අසුරා දැමීමම. නොඑසේ නම් මේ හරහා සිදුවන්නේ ජනතාව කබලෙන් ලිපට වැටීමය. මා එසේ කියන්නේ ඇයි? දැන් පවතින සමානුපාතික නියෝජන ක්‍රමය තුල අපේක්ෂකයන් 20-25 ක නියැදියකින් (අදාල මැතිවරණ දිස්ත්‍රික්කය අනුව මේ ගණන වෙනස් වේ) තිදෙනෙක් තෝරා ගෙන තම නියෝජිතයන් ලෙස පත් කර යැවීමට ඡන්දදායකයාට යම් සීමිත අවකාශයක් නිදහසක් ඇත. නමුත් කේවල ක්‍රමය තුල තම මැතිවරණ කොට්ඨාශය උදෙසා පක්ෂය විසින් තෝරා දී ඇති එකම පුද්ගලයෙකු ම පත්කර අත පිසදාගැනීමට ඡන්දදායකයාට බලකරණු ලබයි. එපමණක් නොව අර මුලින් කී 20-25 කුලකයට ඇතුලුවීමට යම්කෙනෙකුට ඇති ඉඩ අවකාශය ද අප විසින් තක්සේරු කළ යුතුව ඇත. පක්ෂ නායකයන්ට/බලධරයන්ට, මේ නාමයෝජනා ලැයිස්තුව හරහා සාපේක්ෂව විශාල පිරිසක් ජනතා විනිශ්චයට යොමු කිරීමට ඉන් අවකාශ තිබිණි. කේවල කොට්ඨාශ ක්‍රමය තුල මේ අවස්ථාව සීමිත වන අතර එක් එක් මැතිවරණ කොට්ඨාශ තුල ආසන සංවිධායක වරු ලෙස (පෙර සිටි නාමයෝජනා ලැයිස්තුවේ සිටි පිරිසිට වඩා ඉතා අඩු පිරිසක්)  පක්ෂ නායකයා ගේ මනාපයට ම පත්කිරීම හා ඒ පිරිස පමණක් මැතිවරණයකදී ජනතා විනිශ්චයට ලක්කිරීම මින් ඉදිරියට සිදුවනු ඇත. මෙහිදී අප විසින් අවධානය යොමු කළ යුතු වැදගත්ම කාරණය වන්නේ, අද වනවිට (හැමෝම කියන පරිදි) දූෂිත ධනවතුන් වංචාසහගතව ඉපැයූ මුදල් වැයකර පාර්ලිමේන්තුවට පත්වී ඇත්නම් මීලඟට ආසන සංවිධායක වරු ලෙස පත්වන්නේද ඒ එයම බවයි. මැතිවරණ ක්‍රමය වෙනස් වූ පමණින් ඔවුන් දේශපාලනයෙන් සමුගෙන යතැයි සතීම මහා මුලාවකි. ඒ වෙනුවට සිදුවන්නේ එවන් නියෝජිතයන් ප්‍රතිත්ෂේප කිරීමට ඡන්දදායකයාට දැනට ඇති සීමිත අවස්ථාව ද සෝචනීය ලෙස අහිමිවී යාම පමණකි.

එසේම කොට්ඨාශ මට්ටමින් බැහැරව සිදු කරන තෝරාගැනීම් ඉතා පැහැදිලි වශයෙන්ම “පත් කිරීම්“ වන අතර ඒ සම්බන්ධව ඡන්දදායකයන්ට මැදිහත්වීමට ඇති අවස්ථාව ශූන්‍යය. මේ තම නියෝජිතයන් තෝරාගැනීමට ඇති ජනතා මතය පැත්තකට ම “විසිවීයාමක්“ නොවන්නේ කෙසේද? ජනතා නියෝජිතයන් තෝරාගැනීම තවදුරටත් මහජනතාව ගේ මනාපයට සිදු වන්නක්නොවේ. ජනතා නියෝජිතයින් තෝරා පත්කරීම සෑහෙන දුරට දේශපාලන නායකකාරකාදීන් ගේ ම රුචි අරුචිකම් මත සිදුවන අත්තනෝමතික කාර්යයක් බවට පත්වීම වැලැක්විය නොහැක. විසිවන සංශෝධනයෙන් විසිවන්නේ ජනතා මතයයි.

මේ ක්‍රමය යෝජනා කළ ජනතාව ගේ තවත් අපේක්ෂාවක් වන්නේ, ඡන්ද අපේක්ෂකයකු මැතිවරණය වෙනුවෙන් ප්‍රචාරක කටයුතු කළ යුතු වන්නේ කුඩා ප්‍රදේශයක (කුඩා ? – මෙය ද පූර්ණ සත්‍යය නොවේ) නිසා යහමින් මිල මුදල් නැති අයකුට වුව ද මැතිවරණයක් ජයගත හැකිවේ ය යන්නයි. මෙය ද මුලාවකි. දැන් සිටින ධනවත් දේශපාලඥයා මනාප ක්‍රමය යටතේ පැවති මැතිවරණයකදී දිස්ත්‍රික්කයක් තුල වියදම් කළ මුදල් කන්දරාව මින්පසු මැතිවරණ කෝට්ඨාශය තුල පමණක් වියදම් කොට තම අරමුණු ඉටු කරගනු ඇත.

කණගාටුදායක කරුණ නම් සමාජය මේ පිලිබඳව සංවේදීතාවක් නොදැක්වීමයි. කේවල ක්‍රමය යටතේ මහ මැතිවරණයක් පවත්වා කලක් ගතවන විට සමාජයට මේ ක්‍රමයේ ගුණ දොස් හොඳින් විද්‍යමාන වන්නට පටන් ගනු ඇති නමුත් එවිට අශ්වයා පැනගොස් සිටිණු ඇත.

 මේ පිලිබඳ කලින් සිදු කල වියමන්:
1

2

3

4

5

6

අලුත් අවුරුද්දේ ගතික සමතුලිතය – Equilibrium by the Sinhala new year

New year

අප සියලු දෙනා ගතික සමතුලිත පරිසර පද්ධතියේ කොටසක් මිස ස්ථාවර ප්‍රපන්චයන් නොවන්නෙමු. මේ බැව් මේඝය තම බ්ලොග් හැඳින්වීමේදී ද දක්වා ඇත. සිංහල අලුත් අවුරුද්ද ද එසේමය. සිංහල අවුරුදුදේ දී ද සිදුවන්නේ එක් පසක සිට අනෙක් පසට සම්පත් ගලායාමයි: තොරතුරු ගලායාමයි: විශ්වාසය ගලායාමයි.

අවුරුදු සමයේ වේගයෙන් ම ගලායන්නේ මුදල් ය. මාසික වැටුප් ලබන රජයේ සහ පෞද්ගලික අංශයේ සේවකයින්ට මෙ මාසයේ වැඩිපුර වැටුපක් ලැබේ. “අවුරුදු ප්‍රසාද දීමනා“ හෙවත් පොදු ව්‍යවහාරයේ “බෝනස්“ ලෙස හැදින්වෙන මේ  මුදල සමහරවිට ඒ මූලික වැටුපට සමාන වූ මුදල් ප්‍රමාණයකි. සමහරවිට මූලික වැටුපමෙන් කීප ගුණයක මුදලකි. ඒ ප්‍රමාණය ආයතනය අනුව වෙනස්වේ. සමහර ආයතන වල කිසිදු “ප්‍රසාද මුදලක්“ සේවකයන්ට නොදෙන මුත් අඩුම කරමින් “උත්සව අත්තිකාරම්“ ලෙස පසුව වැටුපෙන් අයකරගැනීමේ කොන්දේසිය මත හෝ සේවයකයන්ට වැඩිපුර මුදලක් ලබාදීම සිදු කරයි. තමාගේ ම ව්‍යාපාර හෝ ව්‍යවසායක යෙදෙන්නන් ද එසේමය. කුමන ක්‍රමයකින් හෝ ජනතාව අත වැඩිපුර එක්රැස් වන මුදල් එලෙසම රඳානොසිටි.රෙදිපිළි,අහාර ද්‍රව්‍ය ව්‍යාපාරික ස්ථාන වෙතට මේ මුදල් ගලායන්නේ අසුරු සැනිනි.මේ සමතුලිතයේ ස්වාභාවයයි.

අතට මුදල් නොලැබෙණ යම් කෙනෙකු වේ නම් තම ඉතිරි කිරීම් නිදහස් කරගනිමින් හෝ අතැති මුදල් ප්‍රමාණය වැඩි කරගන්නේ මෙකළය. බැංකු වල ඒ.ටී.එම් යන්ත්‍ර අසල දිගු පෝලම් දක්නට ලැබෙන්නේ එබැවිණි.දැන් බොහෝ ආයතන වල සේවක වැටුප් ගෙවන්නේ ද බැංකු ගිණුම් හරහා බැවින් බැංකු වල මුදල් ඉවත්ට ගලායාම සිග්‍රය.සමහර විට මෙය බැංකු තුල මුදල් අසමතුලිතයක් නිර්මාණය කිරීමට ද හේතු වේ. නමුත් සිංහල අලුතු අවුරුදු ක්‍රියාදාමය තුල මමීට කදිම විසදුමක් දී තිබීම සැනසීමට හේතුවකි. එනම් නැකත් චාරිත්‍ර වල “ගණුදෙනු“ සදහා ලබාදී ඇති සුවිශේෂී අවස්ථාවයි. බෙහෝ බැංකු අවුරුදු නැතකට ගනුදෙණු කරයි. ගනුදෙණු කරුවන්ට විවිධාකර ත්‍යාග පිරිනමමින් ඉතිරිකිරීම් දිරිගන්වයි. බොහෝ විට අවුරුදු නැකතට භාර ගන්නේ වසර ඉක්මවා කාලයකට වලංගු වන ස්තිර තැම්පතුය. මෙ මගින් බැංකු තමන් වෙතින් ඉවතට ගිය මුදලි නැවත අද්දවා ගනී. බොහෝ විට පූර්ව අවුරුදු සමයේ හොදින් මුදල් උපයාගත් ව්‍යාපාරිකයින් තම මුදල් ද බැංකු ගත කරන්නේ මේ නැකතටය.සමතුලිතය සම්පූර්ණ වන්නේ මෙලෙසයි.

 මුදල් පමණක් නොව අන් බොහෝ සමතුලියන් ද අවුරුදු සමයේ මෙලෙස විචලනය වන බැව් හොදින් නිරීක්ෂනය කළ විට පැහිදිලි වේ. නිවාඩු හෙවත් විවේකය අවුරුදු සමයේ වැඩිපුර ලැබේ. නමුත් ඊට හිලව්වට අවුරුදු සමයට පෙර හෝ පසුව සේවයකයන් අතිකාල සේවයේ යෙදෙනු අප දැක ඇත. අවුරුදු චාරිත්‍ර කුල ම නොනගත සමය තුල උපවාසයක් සිදුවන්නේ පරිභෝජනය කරන කැලරි ප්‍රමාණය වැඩි වීම තුලිත කිරීම සඳහාය. අවුරුදු නැකැත් අතර ම රැකීරක්ෂා සඳහා පිටත්ව යාමක් දක්වා ඇත.

අවුරුදු චාරිත්‍ර සහ ක්‍රීඩා ආදිය හරහා සාම්ප්‍රදායික දැනුම අලුත් පරම්පරාව වෙත ගලායාම සිදුවේ.පවුල් අතර අසල්වැසියන් අතර ගම තුල රට තුල ප්‍රජාව තුල සුහදත්වය හුවමාරු වීම තවත් සුවිශෙෂී අත්දැකීමකි.

පාඨක ඔබ සැමගේ සිත් සතන් නැවුම් වී සුභ නව වසරක් උදාවේවා යයි ඉත සිතින් පතමු!

රූපාන්තරණ බැලුවෙමි – Watched the Ruupantharana

Ruupantharanaya1

රූපාන්තරණය යන නම ඇසූ විට සිහිපත් වූයේ ෆ්‍රාන්ස් කෆ්කා ගේ කෙටි කතාවයි. නින්දෙන් අවදි වී බලන පුද්ගලයෙකු තමන් කැරපොත්තෙකු බවට රූපාන්තරණය වී තිබීමේ ඛේදවාචකයක් එම කෙටි කතාවට වස්තුබීජය වී තිබිණි. නමුතක් නාලක විතානගේ ගේ කුලුඳුල් සිනමා නිර්මාණය “රූපාන්තරණ“ තුල නම් එවැන්නක් දක්නට නොතිබුණු බව කණගාටුවෙන් වුවද  කිව යුතුය. මෙහි ප්‍රධාන චරිතයක් වන ත්‍රස්තවාදී නායකයා ත්‍රස්තවාදී නායකයකු බව හෙලිදරව් වීම මහා විශාල රූපාන්තරණයක් නොවේ. මක්නිසා ද කතාවේ මුල සිට ම ඔහු තම පෙමිවතිය හමුවේ නිරූපණය කළේ දුෂ්ට (කලු) චරිතයක් ම බැවිණි. කතාව අවසන් හරියේ දී සිදුවන්නේ ඔහු ගේ දුෂ්ඨ බව තවත් තීව්ර කරමින් ඔහු පස්වන ඊලාම් යුද්ධය ඇරඹිමට පැමිණියෙකු බව පෙම්වතියට හෙලි වීම පමණකි. නමුත් ඔහු මුල සිට ම ඇයට අකාරුණික දුෂ්ට පෙම්වතෙකු ම වූවා විණා චිත්‍රපටය තුළ කිසිදු විටෙක ඔහු පුද්ගල චරිතය රූප විපර්යාසයකට නම් බඳුන්වූයේ  නැත.

රූපාන්තරණ හි කතා තේමාව උසස් මට්ටමේ සිනමා නිර්මාණයක් උදෙසා මනාව පෑහෙන්නක් බවට කිසිදු විවාදයක් නැත. නමුත් මේ තේමාව නාලක විසින් ආකර්ශනීය සිනමා නිර්මාණයක් සදහා මනාව ගලපාගෙන ඇත්දැයි යන්න ගැන නම් ඇත්තේ ප්‍රශ්නාර්ථයකි. ත්‍රස්තවාදී නායකයාගේ ප්‍රයත්නය අසාර්ථක කොට පාත්‍රවර්ගයා “ජයපැන් බීම“ අභව්‍ය අත්භුත සිදුවීම් මත සිදුවන්නක් විනා, යුධ හමුදාමය බුද්ධී මෙහෙයුමක් හෝ හෝ වෙනයම් ආකාරයක මනා සැලසුමක ප්‍රතිඵලයක් ලෙස සිදුවන්නක් බව පෙන්වීමට තිර රචකයා කිසිදු විටෙක උත්සාහයක් නොදරයි. ඔහු පෙන්වන්නේ මෙය “මැජික් එකක්“ ලෙස විනා මහ පොළව මත සිදුවන තර්කාණුකූල ක්‍රයාදාමයක් ලෙස නොවේ. ප්‍රේක්ශකයා ගේ ත්‍රාසය භීතිය හා තුකුහලය වර්ධනය වන අයුරින් දිගහැරීමට ඔනෑ කරම් අමුද්‍රව්‍ය ච්ත්‍රපටය තුළට ගොනු කර තිබූ මුත් එනි නිසි පල නෙලාගෙන නොතිබීම ගැන ඇත්තේ කණගාටුවකි.

ජේශ්ඨ හමුදා නිළධාරියා තම දියණිය ගේ පෙම්වතා දුහුබඳින ආකරයක් මෙහි කොතැනකවත් පෙන්නුම් නොකරයි.(අවසාන මොහොතේ නිදහස් සැමරුම් දිනය දා සියල්ල හෙලිදරවු වන මොහොතේ ද ඔහුගේ මුහුණේ ඇත්තේ විස්මයක් ම පමණකි).දියණිය පෙම්වතා සමග නිවෙසට පැමිණි අවස්ථාවේ ඔහු තවත් හමුදා නිළධාරියෙකු දුරකථනය ඔස්සේ අමතන දසුනක් පෙන්වන මුත් ඉන් එහාට එහි ගලායාමක් දක්නට නොලැබේ. මෙහිදී සාරංග දිසාසේකර නම් පුංචි තිරයේ නලුවාට විශාල අසාධාරණයක් සිදුවන බව මගේ අදහසයි. හමුදා නිළ ඇදුමින් සැරසී ඉහල නිළධාරියෙකුට “යර්ස් සර්“ කියනවා හැර වෙනත් රඟපෑමක් ද ඔහුට මේ නිර්මාණය කුල ඉතිරිව නොතිබිණි. (මේ චරිතය සඳහා ආධුනික නලුවෙකු පහසුවෙන් යොදාගත හැකිව තිබිණි).
Ruupantharanaya4
මෙහි පෙම්වතිය “මම තවමත් නුඹට ආදරෙයි, ඒත් මගේ රටට මම ඊට වඩා ආදරෙයි“ කියමින් ත්‍රස්ත නායකයාට වෙඩි තබන දර්ශනය චිත්‍රපටයේ වඩා උද්වේගකර අවස්ථාවක් වන නමුදු, ඇය අතට ස්වංක්‍රීය ගිනි අවියත් පත් වන්නේ කෙසේද? යන පැනයට නිර්මාණය තුල පිළිතුරක් නැත. ආබාධිත ගෘහ සේවකයෙකු ලෙස වෙස්වලා ගෙන සිටිය බුද්ධි අංශ නිළධාරියාට/බෝම්බ නිශක්‍රීය සෙබලා වෙත මේ වගකීම පහසුවෙන් පැවරිය හැකිව තිබුණ මුත්, එය අසාර්ථක වන්නේ මේ සෙබලා ගේ අනන්‍යතාව ඇය විසින් හඳුනාගන්නනේ මේ “නිදහස් දින අවසාන මෙහෙයුම“ අවස්ථාවේ බැව් පෙන්වන නිසාවෙනි. ඇය ඒ ගිණි අවිය සොරකම් කරන්නේ තම පෙම්වතා වන ත්‍රස්ත නායකයා ගෙන් ම නම් එය බෙහෙවින් අතාත්විකය. පස්වන ඊලාම් යුද්ධය ඇරඹිමට එන ත්‍රස්ත නායකයා තමා සතු ගිණි අවි වත් රැකගත නොහැකි දුබලයෙක් ද?

මේ චිත්‍රපටයේ අගක් මුලක් නැති චරිත ද සිදුවීම් ද බහුලය. අන්ධ වයලීන් වාදන ශිල්පිනිය මුලුමනින් ම අපභ්‍රංශයකි. “අහිංසක පෙම්වතාට“ දාර්ශනික පොර ටෝක්ස් දෙන ඇය හිටිගමන් ඇස් පෙනීම ලැබ බිහිසුණු ජාවාරම් වල යෙදේ.ගිණි අවි හසුරුවමින් වෙඩි තබයි;ඝාතන වල යෙදේ. අවසාන රූපරාමුවට ද රිංගා ගන්නා ඇය ආරක්ෂක අංශ වල ද ඇස් වසා, තමා කරණ ලද අපරාධ හා රාජ ද්‍රෝහී ක්‍රියා වලට දඬුවමක් ද නොලබා විදේශ ගතවෙයි.

රෝද පුටුවේ සිටින පිස්තෝලධාරියා ද උහතෝකෝටිකයකි. චිත්‍රපටයේ අවශ්‍යතාව උදෙසාම බුද්ධි අංශ නිළධාරියෙකු තම නිවසේ සේවකයෙකු ලෙස තබාගෙන පරපීඩක වෘතයක් සපුරන ඔහු සියලු මෙහෙයුම් අවසානයේ නැවත ඒ දෙයම කරන්නේ ඇයි? බුද්ධි අංශ හෝ බෝම්බ නිශ්ක්‍රීය අංශ සෙබලා (සියල්ල අවසන) යලි ලෑලි කාමරයේ සිරගත වන්නේ කුමකට ද? නැවතත් ත්‍රස්තවාදී නායකයෙකු අල්ලපු ගෙදර තාවකාලිකව පදිංචි වී පස්වන ඊලාම් යුද්ධය ඇරඹිමට පිඹුරුපත් සකසන තුරුද? වෙස්වලාගෙන සැඟවී සිටින්නේ මීලඟ ත්‍රස්ත මෙහෙයුම අසාර්ථක කිරීමේ චේතනාවෙන්ද?

“අහිංසක පෙම්වතා“ රිය අනතුරකට බදුන් වී අසාධ්‍ය රෝගියෙකු බවට පත්වීම ද වසර තුනක ඈවෑමෙන් “ ආශ්චර්යයකින්“ ඔහු සම්පූර්ණ සුවය ලැබීම ද කතාව ගලායාමට අවනශ්‍ය දෙයකි.රැකියාව අහිමි වීම පවා මදහසපාමින් උපේක්ෂාවෙන් දරාගන්නා ඔහු, අපරීක්ෂාකාරී ලෙස මහමග ගමන්කිරීම හේතුවෙන් අනතුරකට ලක්කිරීම ඒ චරිතයට පිටපත විසින් කරන ලද බලවත් අසාධාරණයකි.

පාත්‍රවර්ගයා ගේ රඟපෑම් වල කිවයුතු දොසක් නැතැයි සිතේ. ප්‍රධාන චරිත නිරූපනය කළ ආධුනික ශිල්පීන් ශක්ති ප්‍රමාණයෙන් තම චරිත වලට සාධාරණය ඉටු කළහ. සංගීතය ද “අද කාලෙට“ ගැලපෙන ලෙස ගලපා තිබිණි. කෙසේ වුවද මෙම චිත්‍රපටය “රූපාන්තරණ“ යන නාමයට සාධාරණයක් ඉටු කළ බව මාගේ හැඟීමයි.සිනමා සිතුවම ආරම්භයේ දී “අලුත් යමක්“ දක්නට ලැබුණ ප්‍රේක්ශකයන්ට නැවුම් අත්දැකීමක් ( නාමාවලියෙන් පවා) ලබාදීමට උත්සහ කළ චිත්‍රපටය අවසාන හරියට එන විට එනම් අද්භූත සිදුවීම් ජාලයකට පසුව පෙම්වතිය තම (සැබෑ) පෙම්වතා සම ග එක්වී ගී ගයමින් සයුරු වෙරළේ කරදිය ස්නානය කරන දර්ශනය වන විට චිත්‍රපටය මුලුමනින් ම සාම්ප්‍රදායික “වට්ටෝරු චිත්‍රපටයක්“ බවට රූපාන්තරණය වී තිබිණි.
Ruupantharanaya3

ගව ඝාතනයට එරෙහිව ප්‍රචන්ඩත්වය – Violence against the cattle saughter

ගව ඝාතනයට එරෙහි තවත් විගඩමක් පසු ගියදා කොටුව දුම්රියපල ඉදිරියේදී රඟ දක්වනු ලැබිණි.මහ මඟ අවහිර කරමින් දෙනෝදාහක් ජනතාව පෙලමින්,ආවේගශීලීව ප්‍රතිවාදීන්ට ගුටිබැට දමින් මේ චීවරධාරීන් කරනා රඟපෑම මෙරටට ද උතුම් වූ බුද්ධශාසනයට ද කරන්නාවූ හානිය සුලු පටු නොවේ.

ඔවුන් නියෝජනය කරන (එසේ යයි කියන)නිර්මල බුදු දහම යථාර්තවාදී,අවිහිංසාවාදී දර්ශනයකි.එය සත්ව ඝාතනය මුලු මනින් ම ප්‍රතික්ෂේප කරයි.ඒ ගැන විවාදයක් නැත.නමුත් “අපට ප්‍රයෝජනවත් සතුන් ඝාතනය නොකරන්න“,“අපට ප්‍රයෝජනයක් නැති සතුන් නම් ඝාතනය කළාට කම් නැත“ ආදී ආත්මාර්ථකාමී මිත්‍යා අදහස් ඒ තුල නැත.

කර්මය හෙවත් ක්‍රියාව පිලිබඳ බුදුන්වහන්සේ දීර්ඝ ලෙස දේශනා කොට ඇත.ඒ සෑම විටෙකම දක්වා ඇත්තේ තමා කරනා වූ ක්‍රියාවක ප්‍රතිපලය තමා ම බුක්ති විදිනා බවයි.යහපත් ක්‍රියා වල යහපත් ප්‍රතිපල ද අයහපත් ක්‍රියාවල අයහපත් ප්‍රතිපල ද ඇති බව උන්වහන්සේ මනාකොට දේශනා කලසේක.එසේ වුව ද කිසිදු විටෙක උන්වහන්සේ වැරදි කරන්නවුන් ඒවායින් මුදවීම සඳහා බලහත්කාරය,බිය වැද්දීම භාවිතා කළේ නැත.නොමඟ ගියවුන් සුමඟට ගැනීමට උන්වහන්සේ භාවිතා කළේ අවිහිංසාවයි.මුසාව සත්‍යයෙන්ද,වෛරය මෛත්‍රීයෙන් ද,මැඬලනවා මිසක ඇසට-ඇස,දතට-දත න්‍යායක් බුදුදහමේ කොතැනක හෝ නොඉගැන්වේ.අන්‍යයන් සෙවීම නොව වැදගත් වන්නේ තමන් ව සෙවීම බව බදුහිමයන් එදා භද්දවල්ලිය කුමාර වරුන් ට දේශනා කල සේක.ලෝකය ඇත්තේ බඹයක් පමණ වූ ශරීරය තුල බවත් බුදු දහමේ ඉගැන්වේ. 

වෛරය ඇග පුරා දවටාගෙන පාරට බැස ඇති ඒ චීවරධාරීන් ඉල්ලා සිටිනනේ කුමක්ද?සමහර විට ඒ ගව ඝාතනය ශ්‍රී ලංකාව තුල මුලුමනින් ම නවතා දමන ලෙස නීති පැනවීම විය හැක.මෙවැන්නක් කළ හොත් ගවඝාතනය සම්පූර්ණයෙන් නතරවනු ඇතැයි ඔවුන් කල්පනා කරනවා විය හැක.

මෙය මුලුමනින් ම මිත්‍යාවක් බව සාමාන්‍ය බුද්ධියක් ඇති ඔනෑම අයෙකුට ඉතා ම පැහැදිලිය.නීතියෙන් තහනම් අපරාධ ඕනෑ තරම් මේ රටේ දිනපතා සිදුවේ.ඒවායේ චූදිතයන් දිනපතා නීතිය හමුවට පැමිණවේ.දඬුවම් ලබයි.ඒත් ඒ වරද වල් කිසිවක් හෝ කවදාවත් මුලුමනින් ම නතර වී නැත.නතර වන්නේ ද නැත.

ගව ඝාතනය වැලැක්වීමේ අරමුණක් ඇත් නම් කළ යුතු වන්නේ ගව මස් කෑමෙන් සහ මස් පිණිස ගවයන් විකිණීමෙන් වැලකීමය.

රට තුල මස් පිණිස ගවයන් ඝාතනය වීමට වඩා භයානක අනතුරු ගණනාවකට අද වින විට මෙරට මිනිස් ප්‍රජාව මුහුණ දී සිටී.ඒ සම්බන්ධව වියයුතු සක්‍රීය මැදිහත්වීමක් දක්වනවා වෙනුවට මේ භික්ෂූන් වහන්සේ කරනුයේ සමාජයේ අවධානය නොවැදගත් දෙයකට යොමු කර සමාජය අගතියට යන වේගය තවත් වැඩි කිරීම නොවන්නේද?

මේ චීවරධාරීන් ගමන් කරන්නේ ලොව්තුරා බුදුහිමයන් දෙසූ මාරගයෙහි නොවේ.සුරියුත් මුගලන් ආදී ආර්ය මහා සංඝ රත්නයට නිගා දෙමින් ඔවුන් මේ ගමන් ගන්නේ බුදුහිමියන් දෙසූ මාර්ගයට ප්‍රතිවිරුද්ධමාරගයේය.ගව ඝාතනයට විරුද්ධව යයි කියමින් පාරට බැස ඇති මේ චීවරධාරීන් කරනුයේ උත්තරීතර බුදු දහම ජාත්‍යන්තර වශයෙන් අපකීර්තියට ලක්කිරීම පමණකි.

සරාගී දේශපාලනය – Acting in the politics

Gayeesha

නිළියන් හා නිරූපිකාවන් එළබෙන බස්නාහිර සහ දකුණු පලාත් සභා මැතිවරණය සඳහා නාමයෝජනා භාරදීම ගැන සැම තැනම කතා වෙයි.මේ නිළියන් දේශපාලනයට අවතීර්ණ වූ මුලු ම අවස්ථාව නොවේ.නිළි රැජිණ විරුදාවලිය ලත් මාලනී ෆොන්සේකා දැනටමත් (ජාතික ලැයිස්තුවෙන්)පාර්ලිමේන්තුව නියෝජනය කරයි.උපේක්ෂා ස්වර්ණමාලී හෙවත් “පබා“පක්ෂ මාරු කරමින් පාර්ලිමේන්තුවේ රැඳී සිටී.අනාර්කලී දකුණු පලාත්සභාවේය.ගීතා කුමාරසිංහ පිරිමින් සමඟ කෙහෙවලු පටලගනිමින් බෙන්තර සංවිධායක ධුරය දරයි.සමහර විට දැන් නාමයෝජනා දෙන නිළියන්ට පූර්වාදර්ශ සපයන්ට ද ඇත්තේ මේ දෙශපාලක නිළි ජේශ්‍යටයන් වන්නට ඇත.වඩාත් ම භයාකන ද එයයි.  

අනි කිසි රැකියාවකට වඩා දේශපාලනයේ ඇති විශේෂත්වය නම් ඊට පිවිසීම උදෙසා කිසිදු මූලික අධ්‍යාපනික සුදුසුකමක් අවශ්‍ය නොවීමයි.මේ ඉඩ හසරඉහලින් ම ප්‍රයෝජනයට ගත් විවිධාකාර දූෂිතයන් දැන් කලක් තිස්සේ උත්තරීතර පාර්ලීමේන්තුව ආක්‍රමණය කොට සිටී.ව්‍යවස්ථාදායක සභාවේ වරප්‍රසාද වලට මුවාවී තමන් ගේ ආත්මාර්ථකාමී අරමුණු මුදුන්පත් කරලනු වස් තම පාලිතයන් අමු අමුවේ පෙලමින් සිටී.රටේ නීතිය අතට ගෙන තම දූෂණ වංචා සියල්ල වසා සුදු පිරුවටයෙන් වසා උපාසකයින් ලෙස පෙනී සිටිති.මේ දූෂිත දේශපාලුවන් අතර මහා පරිමාණ මත්ද්‍රව්‍ය වෙළෙන්දන් ද, සොරුන් හා වංචාකාරයින් බහුල බව ද ප්‍රසිද්ධ රහසකි.

ඒ අතරට නිළයන් හෝ නිරූපිකාවන් ද එක්වීම කුමන ආකාරයක වෙනසක් සිදු කරයිද?

මේ පල් වලම ඉහගෙන කනු මිසක් පැහැදිලි වෙනසක් සුදු නොකරනු ඇතැයි යන්න අපගේ අදහසයි.හුදු ජනප්‍රියත්වය නිසා ම ජනතා මනාපය ඉහලින් ම ලැබ මැතිවරණ දිනා පාර්ලිමේන්තුවට (හෝ අදාල ආයතනයට)පිවිසෙන මුත් දේශපාලනය පිලබඳ නොදැනීම ද උන්නතිකාමය ද නිසා මොවුන් ද අවසානයේ නතරවන්නේ අනෙක් දූෂිතයින් සිටිනා මඩ ගොහොරුවේමය.නොඑසේ නම් මංත්‍රී ධූරය හරහා ඔවුන් සතුවන බලයෙන් පල ලබන්නේ ඔවුන් ව අතකොලු බවට පත් කරගන්නා වෙනත් කපටි කෛරාටිකයින්ය.පබා තම පුද්ගලික ජීවිතය ද අවුල් කරගන්නේ මෙවන් කුමන්ත්‍රණයක් නිසා බැයි පතලය.

කෙසේ වුවද දින පසුගිය දිනෙක විද්‍යාවේදී පිටිදූවේ සිරිධම්ම හිමයන් ඉතා නිවැරදිව ප්‍රකාශ කලාක් මෙන් මෙරට ජනතාව “මහ මෝඩයෝය“.උත්තරීතර මිනිසුන් කළ යුත්තේ මේ මෝඩයින් ගේ මෝඩ කම් නැති කොට ඔවුන්ට ඥානාලෝකය ලබාදීම වුවද ජනනායකයින් බහුලව සිඳුකරන්නේ මෝඩ කම ප්‍රයෝජනයට ගෙන තමන් ගේ දියුණුව සලසා ගැනීමය.ඒ අතින් මේ නිළි බලකාය ද තම අලුත් ම රඟපෑම හොදින් ම කරනු ඇති බවට සැකයක් නම් නැත.  

සංඝරාජ හිමියන් ගේ දානය සහ කුඩු කන්ටේනරය-An useless struggle

DOg fighttingවැලිවිට අසරණ සරණ සරණකර සංඝරාජ හිමියන් මෙරට බෞද්ධ ඉතිහාසයේ අතිශයින් වැදගත් චරිතයකි.වැලලී යාමට ගිය බුදු සසුන යලි නගාසිටුවනු වස් බුරුමයේ සිට මෙරටට වැඩම කරවා උපසම්පදාව යලි ස්ථාපිත කිරීමට අප්‍රතිහත ධෛර්යයෙන් යුතුව කටයුතු කලේ උන් වහන්සේ ය.සිදු කරන ලද ශාසනික සේවාව නිසා උන්වහන්සේ එවකට සෙංකඩගල රජ ව සිටි පළමුවෙනි විමලධර්මසූරිය රජතුමා ගේද නොමද ගෞරවයට ලක්ව සිටිසේක.

මහනුවර මල්වතු විහාරයේ වැඩ සිටින අතර දිනක් උන්වහන්සේට අපූරු සිතිවිල්ලක් පහල විය.එනම් බලු-කපුටු දානයක් දීමේ අදහසයි.කුඩා පරිමාණයෙන් බල්ලන් දෙතුන් දෙනෙකුට නොව මේ පුණ්‍යකර්මය මහ ඉහලින් ම කළ යුතු යයි කල්පනා කළ උන්වහනසේ රජතුමා ගේ ද සහයෝගය ලැබ හැකි ඉහලම මට්ටමින් බලු-කපුටු දානය සංවිධානය කළේය.ඉස්තරම් ම ආහාර ද්‍රව්‍ය රැස් කොට අහල ගම් හතක පමණ සිටින බල්ලන් ද මල්වත්තේ පංසල් මිදුලට රැස්කෙරිණි.පුංචි සිරීපාද කන්දක් මෙන් පෙනෙන ලෙස දන් ගොඩ ගොඩ ගස්වා බල්ලන් කැදවා කෑමට සලස්වන ලදී.අහෝ ! බල්ලන් දන් වැළඳුවේද?නැත එතැන සිටි බල්ලන් සියල්ලන්ට වේල් තුන හතරකට සෑහෙන පමණ ආහාර ප්‍රමාණයක් එහි තිබුණ ද බල්ලන් ඒවා කෑවේ නැත.ඒ වෙනුවට අනෙක් බල්ලා තමාගේ කෑම ඩැහැ ගනී සිතා සෑම බල්ලෙක් ම වෙනත් බල්ලෙක් සමග පොරයට පිවිසිණි.දානය දී ස්වල්ප වේලාවකින් බලන විට දන් ගොඩ එහෙමම පැත්තකය-මිදුලේ අනෙතක් කෙලවර බල්ලන් එක පොදියට “බලු පොරයේය“.

මේ දුටු රජතුමා “සඟ රජ වුනත් ඉතිං ගම තුම්පනේ නේ“යයි කියූ බවත් ඒ ප්‍රස්තාව පිරුල ජන වහරට එක් වූයේ ඉන් පසුව බවත් ජන සාහිත්‍යයේ  දැක්වේ.

මේ අතීත කතාව මතක් වූයේ මේ දින වල කුඩු කන්ටේනරයක් සම්බන්ධව රටේ දෙපිරිසක් මහා බලු පොරයකට වැටී සිටිනු දක්නට ලැබෙණ විටය.

කුඩු කන්ටේනරය රේගුවෙන් නිදහස් කිරීමට අගමැතිතුමා ගේ ලේකම් වරයෙකු ලිපියක් දුන්නේ යයි වාර්තා පලවෙයි.එය පදනම් කරගෙන අගමැති තුමා තනතුරෙන් ඉල්ලා අස්විය යුතු යයි හෙළ උරුමය කෑගසයි.චීවරධාරියෙක් තමන් අස්වන්නට බලකරන්නේ යයි අගමැති කෑගසයි.චීවරධාරියා යයි තමන් අපහාස කළ අගමැති තමන්ගෙන් සමාව ගතයුතු යයි හිමි නම කෑගසයි.හිමි නම ගේ නියෝජිතයෙකුට නගරසභාවට නාමයෝජනා නොදුන් බැවින් තමන්ට පහර ගසන බව අගමැති යලි පවසයි.නායක හිම නමකට අපහාස කළ අගමැති ගෙදර යනු කියමින් හෙළ උරුමය උසාව  ගොස් නඩු දමයි ,යලි කෑගසයි.තමන් සමාව ගැනීමට සූදානම් නැතැයි අගමැති යලි කෑගසයි.අගමැති කාර්යාලයට පෙලපාලියෙන් යල හිමි වරු පිරිසක් කලහකාරී ලෙස හැසිරෙමින් පොලීසිය සමඟ ගැටේ.හිමි නමක් පහර කෑමට ලක් වන අතර ඊට අගමැති වගකිව යුතු යයි අර හිමි වරු නැවත කෑගසයි.

මේ සියල්ල අතරේ මිදුලේ ගොඩ ගැසුන දානය ගොඩ කාට කාටත් අමතකය.දකුණු ආසියාවෙන් හමුවූ විශාලතම මත්ද්‍රව්‍ය තොගය කාටත් අමතකය.අනුර දිසානායක මන්ත්‍රී වරයා පවසන පරිදි මේ අතර කුඩු වලින් භාගයක් පමණ මේවන විට අතුරුදන් වීලාය.රූපවාහිනී කැමරා ද ඒ හරහා රටම ද බලු පොරය තලු මරමින් බලා සිටින අතර කුඩු ගෙනා එකා පාඩුවේ තමන් ගේ බිස්නස් එක කරගෙනය.

තමන්ට සිදු වන අපහාසය ගැන තම ආඩම්බරය ගැන සංවේදී වනු මිසක මේ ජාවාරම් කරුවා කොටු කරගැනීම පිලිබදව කිසිවෙකු ගේ හෝ අවධානයක් යොමුවන බවක් නොපෙනේ.මේ ජාවාරම් කාර දුර්ජනයා නිසා රටේ තරුණ පරපුරට සිදුවන විනාශය කිසිවෙකුටත් නොපෙනේ.අගමැති ගෙදර යාම හෝ නැතහොත් රුපියල් වලින් අපහාස වන්දි ගෙවීම හෝ එසේත් නැත්නම් හෙළ උරුමය ගෙදර යාම හෝ මත්ද්‍රව්‍ය ජාවාරම හා සසදන විට නොගිනිය හැකි තරම් කුඩා දේය.මේ ජාවාරම් කරුවා අල්වාගත යුතුය.ඔහු ගේ අලගිය මුල් ගිය තැන් සොයාගත යුතුය.නීති ප්‍රකාරව දඬුවම් කළ යුතුය.

හෙරොයින් මිලී ග්‍රෑම් ගනනක් ලඟ තබාගැනීම අපරාධයක් වන පසුබිමක කිලෝග්‍රෑම් තුන්සිය ගණනක හෙරොයින් වෙළඳාම් කරනා ජාවාරම්කරුට ගැවීයාමට ඉඩ දීම ජාතික අපරාධයකි.එයින් සිදු වන්නේ මේ ජරමර අස්සේ තවත් විස මත්ද්‍රව්‍ය තොගයක් ශරීරගතව පරපුරක් දංගෙඩියට යාම පමණකි මේ ඛේදවාචකය වැලැක්වීම බලධාරීන් ගේ වගකීමයි.

ශර්මා එයි, සිංග් නැත – Sharma arrives, No sign of singh

CHOGM sym

[පොදුරාජ්‍ය මණ්ඩලීය මහලේකම් කමලේෂ් ශර්මා මහතා ඊයේ (නොවැම්බර් 9)දිවයිනට ලඟාවීමෙන් පසු,මෙරට ප්‍රමුඛ පෙලේ ජනමාධ්‍යයක් සමග කළ සම්මුඛ සාකච්ඡාවකින් උපුටා ගැනිනි.]

ප්‍රශ්නය-ලංකාවේ පැවැත්වෙන පොදුරාජ්‍ය මණ්ඩලීය රාජ්‍ය නායක සමුලුව ගැන ඔබේ අදහස කුමක්ද?

පිළිතුර-හිරු නොබසින අධිරාජ්‍යයේ සාඩම්බර යටත් වැසියන් වශයෙන් ඇත්ත වශයෙන් ම අපි කාටත් සතුටු වෙන්න පුලුවන් අවස්ථාවක් මේක.කවදත් මුල අමතක නොකරන ලංකාව ශතවර්ෂ කීපයක් තමන් ගේ ස්වාමියා වෙලා හිටපු බ්‍රිතාන්‍යය යට කෘතගුණ දැක්වීම උදෙසා සංවිධානය කරන මෙම සමුලුව ලෝක රාජ්‍ය නායක සමුලු ඉතිහාසය උඩු යටිකුරු කල විප්ලවීය මොහොතක් ලෙස බය නැතිව මට ප්‍රකාශ කරන්න පුලුවන්.

ප්‍රශ්නය-ඇයි ඔබ එසේ කියන්නේ

පිළිතුර-එසේ කියන්නේ හේතු ඇතුව.බලන්න මේ උත්සවය වෙනුවෙන් ශ්‍රී ලංකා රජයේ සහ එහි ජනතාව ගේ කැපවීම.බලන්න මෙහි බුද්ධිමත් පාලකයන් මේ සමුලුව ගැන අධ්‍යයනය කිරීමට ම සියලුම විශ්ව විද්‍යාල සිසුන්ට සතියක අධ්‍යයන නිවාඩු පවා ලබාදෙන හැටි.බලන්න අගනුවර නගරසභාව තමන් ගේ බැංකු ගිණුමේ අන්තිම සතයත් වියදම් කරල නගරය ලස්සන කරන අපූරුව.බලන්න මේ සතියක විතර කාලයේ පිටින් එන රාජ්‍ය නායකයන් ගේ ගමන්බිමන් වලට පමණක් රුපියල් ලක්ෂ 1,600ක වියදමින් ලංකා රජය යොදවන අධි සුඛෝපභෝගී බෙන්ස් රථ.ඒ විතරක් ද අධිවේගී මාර්ග,නවීකරණය කළ ගුවන්තොටුපල,දැවැන්ත සම්මන්ත්‍රණ ශාලා,රාජ්‍ය නායක බිරින්දෑ වරුන් ගේ ගෙල පලදින වටිණා ආභරණ.සමුලුව වෙනුවෙන් ඔබරටේ කැපවීම අති විශිෂ්ඨයි.ඒ ගැන කතා දෙකක් නෑ.

ප්‍රශ්නය-ඔබ හිතනවද මේ පුංචි රට ලොවටම ආදර්ශයක් සපයනවා කියා?

පිළිතුර-පැහැදිලිවම.මා යෝජනා කරනවා ලෝකය ඒ ආදර්ශය ලංකාවෙන් ලබාගත යුතුයි කියල.ඒ වගේ ම  මම විශ්වාස කරනවා මීලඟට නිව්යෝර්ක් නුවර යූඑන් සමිට් එක පැවැත්වෙන විට හාර්වඩ් ඇතුලු සියලු විශ්ව විද්‍යාල වලට රජයෙන් නිවාඩු දෙයි කියල.ඒ වාගේ ම මම හිතනවා ජීනීවා වල පැවැත්වෙන සෑම වැදගත් සමුලුවකදීම ඒගැන අධ්‍යයනය කරන්න සූරික් ඇතුලු සියලු විශ්වවිද්‍යාල වලටත් ස්විස්ටර්ලන්තයේ රජය නිවාඩු ලබා දෙයි කියා

ප්‍රශ්නය-සමුලුව පිලිබඳ මේ රටේ ජනතාව ගේ කැපවීම ඔබ දකින්නේ කොහොමද?

පිළිතුර-රජයට මනා සහයෝගයක් රටේ ජනතාව ගෙන් ලැබෙනවා,එය විශිෂ්ටයි.මට දැනගන්න ලැබුණා මේ උත්සවය වෙනුවෙන් රඟන,ගයන පාසැල් දරුදැරියන් ඒ වෙනුවෙන් යන සියලුම වියදම් ස්වේචාවෙන් ම දරනවා කියල.ඒ තමන් ගේ අධ්‍යයන කාලයෙන් කරන කැපකිරීමට අමතරව වසර අවසාන වාරවි භාගය කට උඩ තියෙද්දිත්.ඒ වගේ ම අගනුවර ජනතාව සමුලුව වෙනුවෙන් තම ගෙවල් දොරවල් පිලිසකර කරල තීන්ත ගාගන්නේ තමන්ගේ ම වියදමින්.තමන් ගේ එදිනෙදා කාර්යයන් මදකට නතර කරලයි මේ එන රාජ්‍ය නායකයන්ට පාරතොටේ ඉඩ වෙන්කරල දෙන්නේ.මේ රටේ ජනතාව ගේ කැප කිරීම් ගැන එක් සුලු උදාහරණ කීපයක් පමණයි.

ප්‍රශ්නය-සමුලුවේ සංවිධාන කටයුතු ගැන ඔබේ අදහස් කොහොමද?

පිළිතුර-අනභිබවනීයයි.සමුලුවට සහභාගී වෙලා දේශන කරල ඒවා අහල අතට අත දීල,ද්විපාර්ශවික සාකච්චා පවත්වනවාට අමතරව මෙරට විසින් ආගන්තුක රාජ්‍ය නායකයන් වෙනුවෙන් ලබාදෙන අත්දැකීම් සුවිශාලයි.දක්ෂිණ අධිවේගී මාර්ගය,මත්තල ගුවන් තොටුපල,හම්බන්තොට වරාය,නෙලුම්පොකුණ මේවාගේ දෙවල් ඒ රාජ්‍ය නායකයන්ට දැක බලාගන්න ලැබීම මොනතරම් දෙයක්ද?එත් ඔබේ රටේ ජනතාවට ලැබෙන සමහර අමිල වරප්‍රසාද මේ රාජ්‍ය නායකයන්ට ලබානොදීම ගැන නම් මගේ එච්චර සතුටක් නෑ.

ප්‍රශ්නය-මොනවද ඒ වරප්‍රසාද?

පිළිතුර-අධිවේගී මාර්ගයේ පයින් ගමන්කිරීම වගේ වරප්‍රසාද.කමක් නෑ අපි ඒවා අමතක කරමු.මම හිතනවා ආගන්තුක රාජ්‍ය නායකයින් මෙය ඉවසා දරාගනී කියල.

ප්‍රශ්නය-සමුලුව වෙනුවෙන් රජයෙන් සැපයෙන ආරක්ෂාව ගැන ඔබතුමා සෑහීමකට පත් වෙනවාද?

පිළිතුර-මම අතිශයින් ම තෘප්තිමත්.රාජ්‍ය නායකයන්ට මැස්සෙක්ගෙන් වත් හිරිහැරයක් නොවෙන විදියට ආරක්ෂාව තරකොට ඇති බවට මට හොදටම විස්වාශයි.රජු ගේ ඇඟේ වසන මැස්සා කඩුවෙන් කොටල විනාශ කරන ආරක්ෂකයින් ඔබේ රටේ ඉන්න බව ලෝකයේම ප්‍රසිද්ධයි නේ.

ප්‍රශ්නය-එතකොට සෞඛ්‍ය පහසුකම්

පිළිතුර-ඉතාමත් ම හොදයි.මම සොයා බලපු විදියට පැය 24 ම ක්‍රියාත්මක ගිලන්රථ බලකායක්,ජාතික රෝහලේ සුඛෝපභෝගී වාට්ටු කීපයක්,දැඩි සත්කාර ඒකකය,සුවිශාල වෛද්‍ය කාර්යමණ්ඩලයක් රාජ්‍ය නායකයන් වෙනුවෙන් සූදානම්.මම ආරාධනා කරනවා ඒ නායකයන්ට හා අනෙක් සම්භාවනීය විදේශ අමුත්තන්ටත් ඒ අයගේ පවුල් වල උදවියටත් තමන්ට තියෙන අට අනූවක් ව්‍යාධි මේ ලැබුණ අමිල අවස්ථාවෙන් පල ලබා සුවකරගෙන යන්න කියල.අපි අමතක කරන්න හොදනෑ සචින් තෙන්දුල්කාර්ට වෙදකම් කළ විස්මිත වයිට් වෙදැදුරා පවා ඉන්නේ මෙ රටේ කියල.

ප්‍රශ්නය-කෙසේ නමුත් මේ සමුලුව සඳහා රැජිණ සහභාගී වන්නේ නෑ නේද?

පිළිතුර-ඇත්ත රැජිණ සහභාගී වන්නෙ නෑ තමයි.එත් රැජිණ දැන් යල්පැන ගිය චරිතයක්.ඒ වෙනුවට චාර්ල්ස් කුමාරයා එන්නේ.නමුත් මටත් පොඩි කණගාටුවක් තියෙනවා විලියම්,කේටී සහ චූටි බබා ජෝර්ජ් මෙරටට නොඑන එක ගැන තමන්ගේ අතීත උරුමයක් දැක බලා ගෙන ආශ්චර්ය විඳල යන්න.

ප්‍රශ්නය-පොදුරාජ්‍ය මණ්ඩලීය තරුණ සමුලුව හෙට(නොවැම්බර් 10) ඇරඹෙනවා.මේ ගැන ඔබේ අදහස කුමක්ද?

පිළිතුර-ඇත්තටම මේක ඉතා සුවිශේෂී අවස්ථාවක්.අනික් තරුණ සම්මේලන වගේ නෙවෙයි මේ “තරුණ සම්මේලනය”නියෝජනය කරන්නේ 60%ක් ම “තරුණයින්”.තරුණයින් තමයි ලොකයේ හෙට දිනය.මම හුගක් ම සතුටු වන්නේ ඒකයි ඒ ගැන.ඒ වාගේ ම සතුටු වෙන්න පුලුවන් කාරණයක් තමයි මේ “රාජ්‍ය නායක සමුලුව”ට ත් සහභාගී වන්නේ 60%ටත් වඩා “රාජ්‍ය නායකයින්”.මොන තරම් ශ්‍රේෂ්ඨද?

ප්‍රශ්නය-හොදයි තිස් වසරක යුද්ධයෙන් පසුව අද අපේ රට පිලිබද ඔබේ අදහස කුමක්ද?

පිළිතුර-මම හිතනවා ඔබේ රට දැන් නියම මාර්ගයේ ගමන් කරනවා කියලා.ජනගහණයෙන් ලක්ෂ 3කට එක් කැබිනට් ඇමතිවරයෙක් ගණනේ සිටින ඔබේ රට නොබෝ දිනකින් ම ලෝකයේ ම ආශ්චර්ය රාජ්‍යය බවට පත්වනවාට මට කිසිම සැකයක් නෑ.බොහෝ විට මේ සමුලුවෙන් පසු ඔබ රට ඒ ජයග්‍රහණය ලබා ගනීවි.

ප්‍රශ්නය-අවසාන වශයෙන් අපට කියන්න සමහර රටවල්,සමහර නායකයින් මේ සමුලුව වර්ජනය කිරීම ගැන ඔබතුමා ගේ අදහස කුමක්ද කියලා?

පිළිතුර-මම හිතන්නේ අපි ඒ ගැන එච්චරම සැලකිලිමත් විය යුතු නෑ කියලයි.හැමදාම කසිකබල් ඉන්දියන් කාර් එකක එහේ මෙහේ යන මන්මෝහන් මහත්තයට සතියකට වත් බෙන්ස් එකක යන්න පින නෑ කියල තමයි කියන්න තියෙන්නේ.

Compair car

(නම්-ගම්,සිදුවීම්,ස්ථාන සියල්ල කතුවරයා ගේ සිතේ මැවුණු හුදු කල්පිතයන් ම පමණක් බව කරුණාවෙන් සලකන්න.)

කැසිනෝ නම් දැලිපිහිය – CASINO needed or not?

Casino

කැසිනෝ යනු සූදුවකි.එනයින් අනෙක් සූදූ ක්‍රීඩා මෙන්ම එය ද  එය බැහැර කළ යුත්තක් බවට විවාදයක් නැත.සිඟාලෝවාද සූත්‍රයෙහි සූදුවෙහි ඇති ආදීනව පැහැදිලිව දක්වා තිබේ.සූදුවෙන් පරාජය ලැබූ විට (සාතිශය බහුතරයක් සූදූ කෙලින්නෝ ලබන්නේ පරාජයයි) ධනය හානිවේ.කලාතුරකින් හෝ ජය ලැබූ විට සතුරන් ඇතිවේ.මහන්සියකින් තොරව ලබාගන්නා ධනය පාපයක් බව මහත්මා ගාන්ධි තුමා දේශනා කොට ඇත.

සෑම සූදුවකට ම පොදු වූ ලක්ෂණ ඇත.මුලින් කියූ පරිදි විශාල පිරිසක් පරාජය ලැබීම හා කීප දෙනක් පමණ ජය ලැබීම ඉන් එකකි.ඇබ්බැහී වීම අනෙක් ලක්ෂණයයි.

තමන්ට හදිසියේ අති විශාල ධනස්කන්ධයකට උරුමකම් කීමට ලැබේ යයි විශ්වාසයක් බොහෝ තුන්වන ලෝකයේ රටවල ජනතාව තුල ඇත.රේස්බුකී වලට දිනපතා තුණ්ඩු දාන්නේ ද,සතියේ දින සතෙහි ම රූපවාහිනියෙන් දිනුම් අදින ලොතරැයි මිලට ගන්නේ ද මේ සිහිනය සැබෑ කරගැනීමේ පරමාර්ථයෙනි. ලැබෙතැයි සහින මවන අතිවිශාල ධනස්කන්ධය පිලිබද බලාපොරොත්තුවට අමතරව සූදු කෙලීම විනෝදාංශයක් බවට පත් කරගත්තෝ ද විරල නොවේ.(බොහෝ විට බටහිර රටවල ධන කුවේරයන් කැසිනෝ ක්‍රීඩා කරනුයේ විනෝදයටයි).මේ අරමුණු දෙකම පෙරදැරි කරගත්තෝ ද සිටිති.සූදුවේ ජය පරාජය අවිනිශ්චිත බැවින් ඒ පිලිබඳ කුතුහලයට ඇති ආශාව නිසා ම මේ සදහා යොමුවන්නෝ ද සිටිති.

සූදුවෙන් පරිබාහිරව ගත්ත ද මිනිසා ජීවත් කරවන්නේ “බලාපොරොත්තුවයි“.

ජය හෝ පරාජය අවිනිශ්චිත වුව ද සූදුවෙන් අනිවාර්යයෙන් ම ජය ම පමණක් ලබන්නෝ ද සිටිති.ඒ මේවා පවත්වාගෙන යන අය,පහසුකම් සපයන අය සහ ඒවායි බදු ලබාගන්නා රජයයි.සූදූ පිටියේ “තෝන්“ ගන්නෝ ද,රේස් බුකියේ “කොමිස්“ගන්නෝ ද සැමදා ම ජයග්‍රාහකයෝ වෙති.

සුරාවෙහි අයහපත් ප්‍රතිවිපාක දැන දැන ම සුරාවට යොමුවන්නෝ සිටින්නාක් මෙන් ම සූදුවේ ප්‍රතිවිපාක දැන දැන ම සමාජයේ පිරිසක් සූදුවට යොමුව සිටී.සුරාව මෙන් ම සූදුව ද නීතිරීති මගින් වැලැක්විය හැක්කක් යයි ලේඛකයා නොසිතයි.රජය මැදිහත් වී සියලු මත්පැන් හල් වල බලපත් අවලංගු කොට ඒවා වසා දැමුවහොත් එහි අනිවාර්ය ප්‍රතිපලය වන්නේ නිතීවිරෝධි මත්පැන් නිශ්පාදනය ඉහලයාමය.සූදුවට සම්බන්ධයෙන් ද එය එසේමය.යම් හෙයකින් රජය මැදිහත් වී සියලුම සූදූ (ලොතරැයි ඇතුලුව)නීති මගින් තහනම් කලහොත් ඒ රික්තකය අනිවාර්ය යෙන් ම නීතිවිරෝධි ක්‍රම හා කලු මුදලාලිලා විසින් පුරවනු ලබව බවට කිසසිදු සැකයක්  නැත.එබැවින්  දුශ්චරිතයන් දුරලීමට ඇති වඩාත් ම සාර්ථක ක්‍රමය වන්නේ මේ සම්බන්ධ සමාජ ආකල්ප වෙනස් කිරීමයි. 

ධනවත් විදේශ සංචාරකයන් ආකර්ශණය කරගැනීමේ පරමාර්ථයෙන් සංචාරක පාරිභෝගිකයන් ඉලක්ක කරගත් කැසිනෝ ක්‍රීඩා පහසුකම් ද සහිත මිශ්‍ර සංවර්ධන ව්‍යාපෘතියක් ලෙස ජේම්ස් පැකර් ගේ විදේශ ආයෝජයක් මෙරටට ලැබීම වරදක් නොවේ යයි කෙනෙකුට තර්ක කළ හැක.ජෝකිම් එලවා දැමුව ද කැසිනෝ තවමත් මෙරට තුල ක්‍රියාත්මකවේ.එනම් රට තුලකොහොමටත් ක්‍රියාත්මක කැසිනෝ නීතිමය රාමුවකට ගොනු කිරීම වඩාත් සාධනීය නොවේ දැයි සැලකිය නොහැකිද?

එය එසේ වුව ද මේ ව්‍යපෘතියේ බරපතල ම නිශේධනීය කාරණය වන්නේ ජේම්ස් පැකර්ට හිමිවන අතිවිශාල බදු සහනයයි.ආයෝජකයාට සියලු ප්‍රතිලාභ ලැබෙන මුත් රජයට තඹ සතයක බදු ආදායම දශකයකට වැඩි කාලයක් (වාර්තා වන අන්දමටයි)නොලැබෙන්නනේ නම් මෙය පල රහිත ව්‍යයාමයක් බව නොකිවමනාය.කැසිනෝ සහ අපරාධ අතර සෘජු සබඳතාවක් ඇති බව අමතක නොකළ යුතුය.දැලිපිහියක් නිසි ලෙස භාවිත කොට විපුල ප්‍රයෝජන ලද හැක්කාක් මෙන්ම,අවභාවිතයෙන් අත-පය පමණක් නොව බෙල්ල ම කැපීයාමට ද ඉඩ තිබෙන බව අමතකනොකළ යුතුය.

හරිත රුධිරධාරීන් කළ යුත්තේ ඉවසීමයි – Green blooded, you have to wait

Sajith

එක්සත් ජාතික පක්ෂයට අනුබද්ධ “ග්‍රීන් බ්ලඩ්”සංවිධානයේ මහසභා රැස්වීමක දී අපූරු එකඟතාවයකට පැමිණ තිබේ.එනම් එක්සත් ජාතික පක්ෂය බලය ලබාගැනීමට කටයුතු කල යුතු බවයි.(මෙය අලුත් දෙයක් නොව දශක කීපයක් පරණ එකඟතාවයක් බව අපි දනිමු.)එමෙන් ම ඒ සඳහා සැලසුමක් ද ඔවුන් විසින් සම්මතකොට ගෙන ඇත.එම සැලැස්ම සැකෙවින් මෙසේය.

එක්සත් ජාතික පක්ෂයේ මීලඟ නායකයා විය යුත්තේ සජිත් ප්‍රේමදාස මහතාය.නමුත් ඔහු ජනාධිපතිවරණයක් හෝ මහමැතිවරණයක් බඳු ජාතික මට්ටමේ මැතිවරණයක දී පක්ෂය මෙහෙයවිය යුතුනොවේ.ඔහු මුලින් ම මෙහෙයවිය යුත්තේ මීලඟට පැවැත්වීමට නියමිත (මෙය කියන්නේ  “ග්‍රීන් බ්ලඩ්”සංවිධානයයි-මූලාශ්‍ර පැහැදිලි නැත)දකුණු පලාත්සභා මැතිවරණයයි.එය ජයගෙන “රජය පැරදවිය හැකියි“යන මතය ජනතාව තුලට කාවද්දා ඊලගට එන ජාතික මට්ටමේ මැතිවරණය සජිත් මහතා ගේ නායකත්වය යටතේ පහසුවෙන් ජයගත හැක.

එම සැලසුම සාර්ථකත්වයට පූර්වාදර්ශ ලෙස ඔවුන් පෙන්වන්නේ 1993දී වසර 17ක එ.ජා.ප පාලනය බිඳ දැමීමට පොදුජන එක්සත් පෙරමුණ දියත් කළ සැලැස්මයි.ඒ වන විට ජනප්‍රියත්වයෙන් පිරිහී සිටි ශ්‍රි ලංකා නිදහස් පක්ෂ නායිකාව වන සිරිමා බණ්ඩාරණායක මැතිණිය නායකත්වයේ සිටියදීම බස්නාහිර පලාත් සභා මැතිවරණය සදහා වඩා ආකර්ෂණීය තරුණ නායකත්වයක් ලෙස චන්ද්‍රිකා මැතිණිය ඉදිරිපත් කොට ඉන් ජය ලබා ඒ ජය මාවතේ ඉදිරියට ගොස් ඇය විධායක ජනපති පුටුවේ හිඳුවීමට හැකියාව ලැබිණි.

අලුත් අදහසක් වුව ද මේ සුරංගනා කතාවේ හිදැස් රාශියක් ලේඛකයාට පෙනේ.වසර 17ක එ.ජා.ප පාලනය බිද දැමීමට ඇත්තටම මුල්ම වෙඩි මුරය තැබුවේ 1993 බස්නාහිර පලාත් සභා මැතිවරණය නොව ඊට පෙර පැවති දකුණු පලාත් සභා මැතිවරණයයි.දකුණු පලාත සාම්ප්‍රදායිකවම එ.ජා.ප යට අවාසි සහගත “වමට බර“ප්‍රදේශයකි.එ.ජා.ප රජයට විරුද්ධව  ජනතා විමුක්ති පෙරමුණු කැරැල්ල දරුණුලෙස ම පැවතුනේ ද එනිසා ම රජයේ දරුණු මර්ධනයට වඩාත් ලක්ව සිටියේ ද දකුණු පලාතයි.රජය කෙරෙහි ජනතාව වඩාත් ම කලකිරී සිටියේ ද දකුණු පලාත තුලය.කෙසේ වුවද මේ සියලු වාසිදායක සාධක මත පවා එම මැතිවරණය ශ්‍රී.ල.නි.ප ප්‍රමුඛ සභාගය ජයගත්තේ සීමිත ඡන්ද ගණනකිනි.(නමුත් කුප්‍රකට ෆ්‍රැන්සිස්කුකරණය නම් ක්‍රියාවලිය හා රජය හා විපක්ෂය අතර බල අරගලය තියුණු විම නිසා දෙවන මැතිවරණයක් පැවැත්වීමට සිදුවූ අතර එයින් විපක්ෂය පැහැදිලි ජයක් ලැබීය).

“ග්‍රීන් බ්ලඩ්”පවසන පරිදි ම මීලඟට පැවති පලාත් සභා මැතිවරණයට චන්ද්‍රිකා මැතිණය ගේ නායකත්වය යටතේ ශ්‍රී.ල.නි.ප ඉදිරිපත් ව ජයලැබූ බව සත්‍ය වුවද එම ජයග්‍රහණය පිටුපස තිබූ එකම සාධකය ඇය නොවේ.මේව වන විට එ.ජා.ප ය සිටියේ දෙකඩවීමට ලක්වය.ලලිත් ඇතුලත්මුදලි,ගාමිණි දිසානායක වැනි එ.ජා.ප නායකයින් ජනාධිපති රණසිංහ ප්‍රේමදාස මහතාට එරෙහිව ඉදිරිපත් කරන ලද දෝශාභියෝගය හේතුවෙන් පක්ෂයෙන් නෙරපනු ලැබ සිටි අතර කලකිරුණු එ.ජා.පාක්ෂිකයන් ඔවුන් ගේ නායකත්වයෙන් යුතු ප්‍රජාතන්ත්‍රවාදී එක්සත් ජාතික පෙරමුණ (රාජාලියා)වටා ඒකරාශි වෙමින් සිටියහ.සැබැවින් ම චන්ද්‍රිකා මැතිණියට බස්නාහිර පලාත්සභාවේ බලය ලබාගැනීමට හැකි වූයේ මැතිවරණ ප්‍රතිපල නිකුත්වීමෙන් අනතුරුව ප්‍ර.එ.ජා.පෙ සමඟ සන්ධානගත වීමෙන් පසුව බව ද මෙහිදී සිහිපත් කළ යුතුය.(ප්‍ර.එ.ජා.පෙ සැලකෙන්නේ ලංකා දේශපාලන ඉතිහාසය තුල එදාමෙදා තුර බිහිවූ හොදම තුන්වන් බලවේගය ලෙසයි).

එදා තත්වය අද හා සසඳා බලමු.අද පාලක පක්ෂය තුල එදා එ.ජා.පය තුල තිබුණා මෙන් පිපිරීමක් දක්කට නැත.(විධායක ජනපතිට එරෙහිව දෝශාභියෝගයක් ගෙන ඒම කෙසේ වෙතත්,18 වන ආණ්ඩු ක්‍රම ව්‍යවස්ථා සංශෝධනය හරහා ඔහු ගේ ධුර කාලය ද අසීමිතව වැඩිකරදී ඇත).යුධ ජයග්‍රහණය නිසා ජනතා චිත්ත සන්තානය තුල ලැගුම් ගෙන ඇති රජය කෙරෙහි ඇති ප්‍රසාදය තවත් චිරත් කාලයකට මෙලෙසම පවතිනු ඇත.මෙය හැම රජය මැතිවරණයක් ම දිනවන අදිසි බලවේගය යි.

දකුණු පලාත කොහොමටත් එ.ජා.ප යට අවාසිදායක ප්‍රදේශයකි.(සටනක් ඇරීඹීම සඳහා එ.ජා.ය ට කොළඹ හෝ මහනුවර මීට වඩා හොදය) .

එනිසා කණගාටුවෙන් වව ද හරිත රුධිරධාරීන් ට කිවයුතුව ඇත්තේ ඔබේ සැලැස්ම අසාර්ථක වනු ඇති බවයි.සජිත් ප්‍රේමදාස මහතා පාර්ලිමේන්තුවෙන් ද ජාතික දේශපාලනයෙන් ද එලවා දමා දකුණු පලාත් සභා විපක්ෂ නායක ධුරයේ සිරකොට තැබීමට නම් මේ සැලැස්ම පංකාදුය.

දශක කීපයක් තිස්සේ විපක්ෂයට වී සිටීම නිසා හරිත රුධිරධාරීන් හෙම්බත් වී ඇතුවාට සැකයක් නැත.නමුත් කුමක් හෝ හයිය වැල්පොටක් පෑදෙන තුරු මේ ඉඩෝරය ඉවසාගෙන සිටිනවා හැර විකල්පයක් ඔවුන්ට නැත.

ලංකා ඊ නිවුස් අනාගත් හැටි – How it can believed now?

අප රටේ පවතින්නේ පසුගාමී සමාජයක් යයි කියනු ලැබේ.කාලීන සමාජ හා දේශපාලන සංසිද්ධි පිලිබඳව ජනතා සංවේදීතාව අඩුය.එනිසා ම ඒවාට උචිත ප්‍රතිචාර නිසි අවස්ථාවේ නොදැක්වෙයි.මැතිවරණ යනු මේ ස්වාභාවය කදිමට පෙන්වන අවස්ථාවකි.ජනමාධ්‍ය ක්‍රියාත්මක විය යුතුවන්නේ මෙවන් ජනතාවකට ඉදිරියෙන් සිට මඟ කියාදීමටය.නමුත් අවාසනාවට මෙරට සිදුවන්නේ එහි අනෙක් පැත්තය.අහනවාට බලනවාට හොය හොයා සල්ලි බෙදන,මළ මිනී හා කඳුලු සාලයට ගෙනත් විකුණන,ප්‍රධාන ධාරාවේ ජනමාධ්‍යය ගැන කතාකිරීම මේ ලිපියේ පරමාර්ථය නොවේ.විකල්ප මාධ්‍ය ලෙස ප්‍රකටව පවතින,තර්ජන හේතුවෙන් රටින් පිට සිට ක්‍රියාත්මක වන ලංකා ඊ නිවුස් වෙබ් අඩවිය පසුගිය පලාත් සභා මැතිවරණය සම්බන්ධව කල කී සමහරක් දෑ පිලිබඳව වමසීම මෙහි පරමාර්ථයයි.

මැතිවරණයට පෙර වයඹ පලාත් සභාවේ ප්‍රතිපලය ගැන ඊ නිවුස් කීවේ මෙසේය.

“ලණු කා දැන් කඹ වමාරන්නට සිදුවී තිඛෙන රිලාසිරි තමාට මහ ඇමැති කම ලබා ගැනීමට අවශ්‍ය දිස්ත්‍රික්කයේ වැඩිම මනාප ලාභියා වීමට නොහැකි බව තේරුම් ගෙන තිබේ.හිටපු මහ ඇමැති වරයා දෙවැනි තැනට පත් වනු ඇතැයිද රිලාසිරි තුන් වෙනි තැනට පත් වනු ඇතැයිද සමීක්ෂකයන්ගේ තොරතුරු දැකීමෙන් ඔහු පෙරේතයා පොළොවේ ගැසුවා සේ මානසිකව වැටී ඇත.”   

මනාප  ප්‍රතිපල නිකුත් වූ විට නමුත් තම අනාවැකිය මුලුමනින් ම වැරදී ගිය පසු මොවුන් පෙරලුන පිට හොදයි කීවේ මෙලෙසය.

“වයඹ සහ මධ්‍යම පලාත් දෙකේම වැඩිම මනාප ගත් දෙදෙනාගේම පසුපස බලවේගය මැදමූලන රාජපක්ෂලාගේ ආශිර්වාදය නොලැබූ ශ්‍රීලනිපයේ රාජපක්ෂවරුන්ට එරෙහි ජ්‍යෙෂ්ඨයන්ගේ කණ්ඩායම් වීමත් නිසා මහ ඇමැති ධූර සම්බන්ධයෙන් රෙජීමය තුල අර්බුදයක් නිර්මාණය වී තිබේ.”

ඉහත ඡේදයෙන් ද කියැවෙන පරිදි ඊ නිවුස් කබරගොයා තලගොයා කරගන්නේ අගමැති පුත් අනුරාධ ජයරත්න සම්බන්ධයෙනි.ටික දිනකට පෙර ග්‍රීස් කන්ටේනරයක් තුල රහසිගතව සඟවා මෙරටට ගෙන්වූ හෙරොයින් තොගයක් රේගුව විසින් අත්අඩංගුවට ගනු ලැබිණි.මේ සම්බන්ධ පුවත් දිගටම පල කළ ඊ නිවුස් එක් අවස්ථාවක කීවේ මේ කන්ටේනරය නිදහස් කරන ලෙස අගමැති තුමා ලිපියක් ලබාදී ඇති බවයි.ඒ වාර්තාව කියැවූ (මහනුවර දිස්ත්‍රික්කයේ)ඕනෑම ඡන්දදායකයකු අනුරාධ ට මනාපය පල කිරීමට පෙර දෙවතාවක් සිතනු ඒකාන්තය.ඒත් උක්ත උපුටා දැකුවූ ලිපියේ මේ කොටස කියවා බලන්න.

“දිමුගේ පුතා කුඩු කේස් එකකට ගාවා එවැනි චෝදනාවක් තිඛෙන නිසා මහ ඇමැති ධූරය දිය නොහැකි යයි කීමට රාජපක්ෂලාට එවිට හැකියාවක් ලැබේ.නමුත් එය රාජපක්ෂලා සිතූ තරම් සාර්ථක වූවාද යන්න සැක සහිතය.මන්ද යත් දිමුගේ වැරදි සියයක් ඇතත් ඔහු කුඩු ගෙන්වනවා යැයි ඔහුගේ සතුරා පවා විශ්වාස නොකරන බැවිනි.” 

අර්ථපතීන් ගේ අභිලාෂයන් මුදුන්පමුණුවනු වස් අසුවන අසුවන දෙයින් තම සතුරාට දමාගැසීම නොව ජනමාධ්‍යයක වගකීම වියයුත්තේ නිසි ලෙස මූලාශ්‍ර සොයා ගෙන පුවත් පල කිරීමයි.ඒ හැර මෙලෙස සනාථ කළ කොහැකි මුසා පල කර අනාගැනීම විකල්ප මාධ්‍යයකට ගැලපෙන්නක් නොවේ.මෙහි අවාසනාවන්ත අවසන් ප්‍රතිපලය වන්නේ බොරුවට “කොටි ආවෝ”යි කැ ගැසූ ගොපලු කොල්ලාට සිදුවූ දෙය,එනම් පාඨක විශ්වාසය බිඳවැටුණ පසු ඇත්තටම කොටි ආවත් ඔය කියන දේ කිසිවෙකු නොපිලිගැනීමය.

යහපත් සමාජයක තීරක බලවේගය විය යුතුතේ දේශපාලන බල අධිකාරය නොව ජනමතයය.ජනමතය ගොඩනැංවෙන්නේ ද,වර්ධනය වන්නේ ද,ප්‍රකාශයට පත් වන්නේ ද ජනමාධය හරහාය.එවන් ජනමාධ්‍ය ද කටයුතු කරන්නේ අමනෝඥ ලෙස නම් ජනතාවට කවර නම් පිහිටක් ද?

උතුරේ ප්‍රතිපලය කියවා බලමු – How could be the Northern Provincial Council ?

2013 NPCE
ද්‍රවිඩ ජාතික සංධානය මැතිවරණ ප්‍රකාශයක් ඉදිරිපත් කළේ තමන් තරඟකළ උතුරු පලාත්සභාව වෙනුවෙනි.නමුත් ඒ අනුහසින් අනික් පලාත්සභාවල ඡන්ද වැටුණේ එක්සත් ජනතා නිදහස් සංධානයට සහ (ෆොන්සේකා මහතාගේ) ප්‍රජාතන්ත්‍රවාදී පක්ෂයට ය .ඒ මැතිවරණ ප්‍රකාශයේ තිබුණේ උතුරු නැගෙනහිර ඒකාබද්ධ කිරීම,පොලිස් හා ඉඩම් බලතල ලබාගැනීම,බඳු දකුණේ සිංහල ජනතාවගේ බොක්ක රත්වෙන ආකාරයේ කාරුණුය.මැතිවරණ ප්‍රකාශයකට නීතිය ඉදිරියේ කුමන ආකාරයේ පිලිගැනීමක් ලැබෙනවද කියන එක හරියට ම පැහැදිලි නැතත් මේ ලියවිල්ලට එරෙහිව දකුණේ යම් යම් සංවිධාන නීතීමය පියවර ගන්නා බවට ප්‍රවෘත්ති පලවිය.රාවණා බලය නම් සංවිධානය මේ ප්‍රතිපත්ති ප්‍රකාශනයට එරෙහිව මැතිවරණ කොමසාරිස් තුමාට ත් පැමිණිලි කර තිබුණි.එම පැමිණිල්ල නීතිපතිවරයාට යොමු කළ එබ එතුමා මාධ්‍යය ඉදිරියේ ප්‍රකාශ කලේය.(පක්ෂයක් මැතිවරණයක් ඉලකක්ක කර ජනතාවට ඉදිරිපත් කරන මැතිවරණ ප්‍රකාශයකට හෝ ප්‍රතිපත්ති ප්‍රකාශයකට එරෙහිව උසාවි යත හැකි නම්, මීට වසර කීපයකට පෙර රජය මැතිවරණයේදී ඉදිරිපත් කල ප්‍රතිපත්ති ප්‍රකාශයේ ඉටු නොකළ පොරොන්දු සම්බන්ධයෙන් කිසිවකු හෝ උසාවි නොයන්නේ මන්දැයි නම් ඇත්තේ ගැටලුවකි.)

කෙසේ වුව ද මේ ද්‍රවිඩ සංධාන මැතිවරණ ප්‍රතිපත්ති ප්‍රකාශය නිළ ලියැවිල්ලක් වේවා හෝ නොවේවා ඒ හරහා පිලිබිඹු වන්නේ උතුරේ ජනතා නායකයන් ගේ අභිලාශයන් නම් සහ ඊට වලංගු ඡන්ද වලින් 80% කට ආසන්න ප්‍රතිශතයක් හිමිවීමෙන් පෙන්නුම් කරන්නේ මෙ සඳහා උතුරේ සාමාන්‍ය ජනතාවගේ ඇති කැමැත්ත නම් එය එතරම් සුභදායක දෙයක් නොවන බව කිවයුතුය.ද්‍රවිඩ ජාතික සංධානය හෙවත් ඉලංගෙයි තමිල් අරසු කච්චි යනු ද්‍රවිඩ දේශපාලන පක්ෂ කීපයක එකතුවක් බව අපි දනිමු.මේ පක්ෂ කීපය එකට සංධානගතව මැතිවරණ සදහා ඉදිරිපත් වන්නේ එල්ටීටී සංවිධනයේ අවශ්‍යතාව නිසා බව ද අපි දනිමු.(ඔවුන් මෙලෙස සංධානගත වූයේ යුධමය වශයෙන් පරාජය වීමට ප්‍රථමය).උතුරේ ඡන්ද වලින් 80%ට කිට්ටු ප්‍රතිශතයක් ලැබීමට මෙය ද හේතු වන්නට ඇත.උතුරේ ද්‍රවිඩ සමාජය 8:2 අනුපාතයට බෙදී ඡන්දය ප්‍රකාශ කර ඇත.මෙය දකුණේ සමාජයේ දේපාලනමය බෙදීමට වඩා වෙනස් ස්වාභාවයකි.

එක්සත් ජාතික පක්ෂය උතුරේ ලද පරාජය ද සැලකිල්ලට ලක්විය යුතුය.ජාතික මට්ටමේ දේශපාලන පක්ෂ කෙරෙහි උතුරේ ජනතාව ගේ ආක්ර්ශනය හීනවී යාම ඛේදජනකය. (මීට පෙර මහේෂ්වරන් බඳු පාර්ලිමේන්තු මන්ත්‍රී වරු එ.ජා.ප ය හරහා උතුරින් බිහිවිය).

ඊලාම්වාදීන් මෙම ඡන්ද ප්‍රතිපලය බෙදී වෙන්වීමට ඇති ද්‍රවිඩ ජනතාවගේ ඇති කැමැත්ත ලෙස දේශීය ව මෙන්ම අන්තර්ජාතිකව ද අර්ථදක්වනු ඇත.සමහරවිට මෙය ඊලාම් රාජ්‍යයක් වෙනුවෙන් තැබූ තවත් පියවරක් ලෙස ද සලකන්නට ඉඩ ඇත.මෙය භයානක තත්වයකි.එදා මහත් කැපකිරීමක ප්‍රතිපලයක් ලෙස නන්දිකඩාල් කලපුවේදී පරාජය කළ මතවාදය යලි හිස එසවීමකි.අප ඊට ඉඩ නොතැබිය යුතුය.කෙසේ වුව ද දැන් උතුරේ ජනතාව(යුද්ධය නිමවී සිව් වසරකට පසුව)තමන් විසින් පත්කරගත් නියෝජිතයන් ගෙන් සැදුම් ලත් පලාත් සභාවක් අභිමුව සිටී.අප (පොදුවේ සියලු රට වැසියන් ද රජය ද)ඒ ජනමතයට හිස නැමිය යුතුය.ඒ ගැන තුටු විය යුත්තෙමු.එමෙන්ම රටේ ඒකීය භාවය ද අනතුරේ නොහෙලිය යුතුය.උතුරු පලාත් සභාව හරහා පරිපාලය බලය බෙදා ගෙන එකම ශ්‍රී ලංකාවක් තුල සමගිව කටයුතු කිරීමට සියලු පාර්ශවයන් උත්සුක වියයුතුය.

දකුණ ද හඳුනන විග්නේශ්වරන් මහතා ගේ නායකත්වයෙන් පත්වන් උතුරු පලාත් සභාව, ස්ථාවර සාමකාමී ශ්‍රී ලංකාවක් වෙනුවෙන් තැබූ යෝධ පියවරක් වේවා යයි ඉතසිතින් පතමු.

විදුලි පණිවිඩ වෙනුවට කෙටි පණිවිඩ – SMS instead of Telegram

Telegram

ශතක එකහමාරක් පමණ සක්‍රීයව පැවති  ලංකාවේ විදුලි පණිවුඩ සේවාව ලබන මස සිට නවතා දමන බව වාර්තා වේ.ලංකාව මෙවන් තීරණයකට එළබෙන්නට ඇත්තේ අසල්වැසි ඉන්දියාව අනුකරණය කර විය හැක.(අපි බොහෝ විට ඉන්දියාව අනුකරණය කරන්නෙමු).අද වන විට අප රටේ දිනකට හුවමාරුවන විදුලි පණිවිඩ ගණන 50 කට ද අඩු බව කියැවේ.යොදන සම්පත් වලට සාපේක්ෂව ලැබෙන ප්‍රතිලාභයක් නැති නිසා මෙම සේවාව නවතා දැමීමට රජය තීරණය කළ විය හැක.

අද මෙන් සංනිවේදන මාධ්‍යය ප්‍රචලිතව නොතිබූ  අතීතයේ සන්නිවේදන පද්ධතියේ සුවිශේෂී ස්ථානයක් විදුලි පණිවිඩ සේවාව විසින් හිමිකරගෙන සිටයේය.ලියුමක් යවනවාට වඩා ඉක්මනින් පණිවඩයක් ග්‍රාහකයෙක් වෙත යැවීමට තිබූ හොදම ක්‍රමය ව පැවතියේ විදුලි පණිවිඩ ක්‍රමයයි.

විදුලිපණිවිඩ කෙරෙහි මෙරට ගැමි සමාජය තුල පැවති ආකල්ප පිලිබද කදිම කතාපුවතක් මහැදුරු එදිරිවීර සරත්චන්ද්‍රයන් ගේ “අපූරු ගම“කෙටි කතාවේ එයි.එහි දී එක්තරා ගැමියෙක් හත්හැවිලි හවමින් ගමවටා අඩමින් යන්නේ රෝහලේ සිට ඔහු නමට විදුලි පණිවඩයක් ලැබීම නිසයි.ඔහු ගේ කුඩා පුතු සිටින්නේ අසනීපයක් හේතුවෙන් ඈත නගරයේ  රෝහල් ගතවය.දැන් දරුවා මිය ගොසිනි.ගමේ ම සෙනග ඔහු අස්වසමින් පසුපස යයි.දහවල් අඩමින් සිටි ගැමියා හවස් කල ගමේ පිරිස සමඟ බජව් දමමින් නටමින් ප්‍රීතිවනු දක්නට ලැබේ.මළ ගෙදරක සූදානමක් දක්කට නැත.කෙටි කතාවේ පූරක මේ ගැන විමසීමේදී හෙලිවන්නේ විදුලි පණිවිඩයේ ඇත්තේ දරුවාට අසාධ්‍ය බව මිසක් මිය ගිය බවක් නොවන බවයි.

“ටැලිග්‍රෑම් එකක් ආවම අපි බය වෙනවනේ,බය වෙන්න එපැයි“ මේ ගැමියා ගේ ආකල්පයයි.

ටී.බී ඉලංගරත්නයන් ගේ විලම්බීත නවකතාවේ එක් අවස්ථාවක තිලක ගේ මව “ගෑණූ ලමයෙක් ටෙලිග්‍රෑම් එකක් කියව ගන්න ඉංගිරිසි ඉගෙන ගත්තම මදැයි“ යි පවසයි.

එවක ඉංග්‍රීසි බසින් ලියවෙන,යලි සිංහලට පරිවර්තන වන විදුලි පණිවිඩ වැරදි ලෙස පරිවර්තනය වීම නිසා සිදුවූ අකරතැබ්බන් ගැන යාන්ස් අප අතර බොහෝ ඇත.මුදල් අය කරන්නේ වචන ගණනට බැවින් විදුලි පණිවිඩ යවන විට පණවිඩය හැකිතාක් කෙටියෙන් ලිවීමට යවන්නා යුහුසුලු වෙයි.මෙවිට ද විදුලි පණිවිඩ වල අර්ථ වරද්දාගත් අවස්ථා අපි අසා ඇත්තෙමු.ලිඛිතව,දුරකථනය ඔස්සේ වාචිකව ආදී වශයෙන් කීපවිටක් මාධ්‍යය කීපයක පරිවර්තනය වෙමින් යන පණිවිඩයක් විකෘති වීමට ඇති ඉඩ අනල්පය. 

මාර්ටින් වික්‍රමසිංහයන් ගේ ගම්පෙරළිය නවකතාවේ ජිනදාස සිංහලේ දී මිය ගිය බව නන්දාට දැනුම් දෙන්නේ රෝහලින් එවන විදුලි පණිවිඩයක් මගිනි.කෙසේ වෙතත් ගම්පෙරලියට විචාර ග්‍රන්ථයක් ලියන ආචාර්ය අලවත්තාගොඩ ප්‍රේමදාසයන් ගේ තියුණු විවේචනයට මේ විදුලි පණිවිඩය ලක්වේ.ඔහුට අනුව මෙවන් විදුලි පණිවිඩයක් කිසිදු විටෙක ලංකාවේ රෝහලකින් නිකුත් නොවෙයි.

“ඔබේ ස්වාමියා මිය ගියා“

සර් ආතර් කොනන් ඩොයිල් නිමැවූ සුප්‍රකට රහස් පරීක්ෂකයා වන ෂර්ලොක් හෝම්ස් තම රහස් පරීක්ෂක කටයුතු සදහා තොරතුරු ලබාගැනීමට විදුලි පණිවිඩ සේවාව යොදාගත් අපූර්ව ආකාරය ගැන සඳහන්ය.

කෙසේවුවද විදුලි පණිවිඩ නම් රංගධරයා රඟහලින් බැසයන විට අනෙක් පසින් ගොඩවන්නේ විද්‍යුත් ලිපි(E-mail)සහ කෙටි පණිවිඩ(SMS) සේවාවයි.විදුලි පණිවිඩ වලට වඩා මේ විකල්ප ඇත්තෙන් ම ඵලදායීය,වේගවත්ය,කාර්යක්ෂමය,නිරවුල්ය,ලාභදායීය.

යම් පණිවිඩයක් ග්‍රාහකයාට යැවූ බවට හෝ ලද බවට ලිඛිත සාක්ශියක් ලෙස විදුලි පණිවිඩ වල භාවිතාවක් විය.රැකියා ස්ථානයෙන් හදිසි නිවාඩු ලබාගැනීම,සම්මුඛ පරීක්ෂණයකට ඉල්ලුමකරුවෙක කැඳවීම මීට උදාහරණ ලෙස දැක්විය හැක.මේලෙස විද්‍යුත් ලිපි සහ කෙටි පණිවිඩ නීතිය ඉදිරියේ සාක්ෂි ලෙස පිළිගන්නේ ද යන්න නම් ලේඛකයා නොදනී,නමුත් එසේ පිලිගැනීමක් ලැබීම නම් අත්‍යාවශ්‍යය.ව්‍යාපාරික මට්ටමින් නම් මේ සදහා පිලිගැනීමක් ඇත.විශේෂයෙන් දුරකථන සමාගම් වලින් මුදල් ගෙවා ලබාගත හැකි මාසික කෙටි පණිවිඩ වාර්ථා(SMS reports) ලේඛකයා රැකියාව කරන ක්ෂේත්‍රයේ නම් නිළ පිලිගැනීමකට ලක්වේ.(ඒ නිසා දැන් ආවාට ගියාට එස් එම් එස් කොටන්නට ද බයය).

නමුත් මොන තාක්ෂණික මෙවලමක් වුව ද සමාජයේ සෑම කොටසකටම ඒකාකාරීව එකම වේගයකින් ගමන් නොකරයි.එනම් ඈත දුෂ්කර ප්‍රදේශ වලට විදුලි පණිවිඩ සේවාවේ අවශ්‍යතාවය තවමත් ඇති බව අප අමතක අමතක කල යුතු නැත.දුරකථන සංඥා නිසි ලෙස නොලැබෙන ප්‍රදේශ තවමත් මෙරට ඇත.එනිසා විදුලි පණිවිඩ සේවාව මුලුමනින් ම නවතා දැමීම නොව තැපැල් දෙපාර්තමේන්තුව සතුව තිබෙන සම්පත් හා නවීන තාක්ෂණය උපරිම ලෙස යොදා ගනිමින් (අවශ්‍යතාව ඇති පරිදි) මේ සේවාව පවත්වාගෙන යාමට කටයුතු කළේ නම් වඩාත් හොද යයි අපි සිතමු.

 

“වීරයා මැරිල” ද “රඟපෑම් ඉවරයි” ද ? – Hero is no more !

පලාතක මහ අමති ධූරයට ලැබෙන වරප්‍රසාද කැබිනට් අමති කෙනෙකුට ලැබෙන වරප්‍රසාද එක හා සමානය.නමුත් බලතල වල වෙනස්කම් ඇත.එය අමති ධූරයට අදාල විශය පථයේ දිග පලල අනුව තීරණය වන්නකි.ආර්ථික සංවර්ධන ඇමති ද සීනි ඇමති ද එකම කැබිනට් අමාත්‍ය වරු වුවද බලතල අහසට පොලොව මෙනි.එමෙන්ම හුදෙක් රාජ්‍ය නිළධාරියෙක් පමණක් ම වන සමහර අමාතංශ ලේකම් වරු ඉදිරියේ  බොහෝ සිල්ලර ඇමති වරු හිරු ඉදිරියේ කදෝපැණියන් බඳු බව අපි දනිමු.

එබැවින් සීනි ඇමති හෝ ලුණු ඇමති වැනි දෙකයි පනහේ ඇමති ධූරයක් භාරගන්නවාට වඩා පලාත් සභාවක මහ ඇමතිකම ලබා ගැනීම වඩාත් නම්බුකාරයයි දයාසිරි ජයසේකර මහතා කල්පනා කරන්නට ඇතැයි ලේඛකයාට සිතේ.නමුත් ජාතික දේශපාලනයේ සිට ප්‍රාදේශීය දේශපාලනය දක්වා පල්ලම් බැසීම නම් මෙතෙක් මෙරට දේශපාලකයනට සුවදායක වී නැත.උතුරු මැද බර්ටි ප්‍රේමලාල් මෙලෙස පල්ලම් බැස සදාකාලික අනාතභාවයට පත් වූ අයෙකුට කදිම උදාහරණයකි.නමුත් එ.ජා.ප චන්ද වලින් ලද පාර්ලිමෙන්තු මන්ත්‍රී ධූරයේ හිදිමින් ම ඇමතිකමක් ගෙන පිල් මාරු කලොත් ඔහුට චන්දය දුන් පාක්ෂිකයන් පාවා දුන්නා යි නැගෙන චෝදනවෙන් ගැලවීම සදහා දයාසිරි මෙම තීරණයට එලඹුණා ද  විය හැක.චන්ද දායකයන් චන්දය දුන්නෙ වසර 5ක් පාර්ලිමේන්තුව තුල එ.ජා.ප ය නියෝජනය කිරීමට බව සත්‍ය උවද දයාසිරි ඉල්ලා අස්වූ නිසා වෙනත් එ.ජා.ප අපේක්ශකයෙකුට ඒ පුරප්පාඩුව පිරවිය හැක.පිල් මාරු කල අනෙකුත් එ.ජා.ප මන්ත්‍රී වරුනට වඩා දයාසිරි ගේ පිල් මාරුවේ යම් සදාචාරත්මක ස්වාභාවයක් ඇත්තේ එබැවිනි.

ඔහු ජනතා අධිකරණය ඉදිරියට පැමිණ තිබේ.දැන් තීන්දුව ඇත්තේ කුරුනෑගල දිස්ත්‍රික් ජනතාව සතුවය.කෙසේ වෙතත් ගුරා දුන් ආදර්ශය පිලිපැදීමට පඩුවස්නුවර ප්‍රාදේශීය සභාවේ ගෝල බාලයන්ට නොහැකි වීම ගැන නම් දුකය.නමුත් ඒ අය ප්‍රාදේශීය සභාවෙන් ඉවත්වී ඉල්ලන්නට මැතිවරණයක් හෝ ඉන්නට තැනක් නැති නිසාවෙන් මන්ත්‍රී ධූරයේ හිදිමින් ම ගුරා පස්සෙන් ආණ්ඩුවට ගියා විය හැක.කූඩැල්ලා මෙන් එක තැනක් අත හරිනවිට ම තව තැනක් අල්ලාගැනීමට හැමෝටම නොහැක.(මා දන්න පරිදි) දයාසිරි වසර 5 ක ධූර කලයක් ගෙවා ඇති නිසා අවම වශයෙන් විශ්‍රාම වැටුපට වත් හිමිකම් කීවද ගෝලයන් එවන් සුරක්ශිත තැනක නැත.

කුරුණෑගල ජනතාව ලක්ශයක ගේ පමණ මනාපය ගෙන මහ ඇමති වීම හෝ අඩුම තරමින් 30,000 ක පමණ මනාප ලැබ මන්ත්‍රී කමක් හෝ ලබා ගැනීමට දයාසිරිට අපහසුවක් නැත.නමුත් ජාතික වශයෙන් රටේ ජනතාව තුල ඔහු මෙතෙක් ඇති කරගෙන තිබූ ප්‍රතිරූපය නම් නැවත කිසිදිනෙක හෝ ගොඩනගා ගත හැකි වේදෙයි සැක සහිතය.දයාසිරි නිකම්ම නිකං විපක්ෂ මන්ත්‍රී වරයෙක් ව නොසිටියේය.සාධාරනයයි කිව හැකි පදනමක සිට ඔහු නොබියව රජය විවේචනය කලේය.දූෂණ වංචා හෙලි කලේය.මේ  නිසා විපක්ෂ මෙන්ම මැදහත් ජනතාව ගේ ද වීරයෙක් ලෙස ඔහු වැජබුනේ යයි කීම අතිශයෝක්තියක් නොවේ.නමුත් දැන් ඒ සියල්ල අවසන්ය.වීරයා මැරිලාය.නොඑසේ නම් රගපෑම් ඉවරය.

රජය හා එක් වීම ගැන දයාසිරි කියන ප්‍රකාශ පිලිගැනීම අසීරුය.ඔහු කියන්නේ විපක්ෂ නායක වරයා ගේ කෙනෙහිලිකම් නිසා තමා එ.ජා.ප ය හැර යන බවයි.නමුත් ඔහු මෙසේ කියන්නේ ඔහුට එරෙහිව පැවති විනය පරීක්ෂණය පවා ඉවත් කරනු ලැබූ පසුබිමකය.විනය ක්‍රියාමාර්ග අවසානයේ පක්ෂයෙන් නෙරපා දමන ලද මෛත්‍රී හා ශිරාල් තවමත් පක්ෂයේ එල්ලී සිටි.ඔහු කියන රජයේ සංවර්ධන ක්‍රියාදාමය ගැන හදිසියේ ඇතිවූ පැහැදීම නම්,ඇනෙස්ලි බර්ටි සැමුවෙල් මහත්වරුන්ට ද හොඳ තරඟයක් දිය හැකි ප්‍රකාශයකි.එමෙන් ම දයාසිරි ගේ නික්මයාම ගැන එ.ජා.ප ය කියන කෝටි 25 කතාව ද පිලිගැනීමට අසීරුය.විශාල මුදලක් වියදම් කොට දයාසිරි මිලදී ගැනීමේ අවශ්‍යතාවක් රජයට ඇතැයි කිව නොහැක.වයඹ හා මධ්‍යයම පලාත් සභා ජය ගැනීමේ අසීරුතාවයක රජය නොසිටී.(උතුර ජය ගැනුමට දයාසිරි ගෙන් පිටිවහලක් නොලැබේ).පර්ලිමේන්තුව තුල තුනෙන් දෙක සදා ගැනීමට ද දැන් අවශ්‍ය නැත.උපේක්ෂා,මනූෂ හරහා ඒවා ඉටු කරගෙන 18 වන ආණ්ඩුක්‍රම ව්‍යවස්ථා සංශෝධනය ද සම්මත කරගෙන බොහෝ කල් ගතවී ඇත් අතර කොහොමටත් පිල් මාරුවෙන් පසු දයාසිරි පාර්ලිමීන්තුවේ නොරඳයි.

එසේ නම් මේ විස්මිත පිල් මාරුව පසුපස ඇති සැබෑ හේතුව කුමක්ද?මෙය දයාසිරි පර්ලිමේන්තුවේදී ම අවංකවම ම ප්‍රකාශ කළේය.ඔහු ගේ තක්සේරුවට අනුව 2022 වනතුරුම එ.ජා.ප ය සිටින්නේ විපක්ෂයේය.මීයක් කඩන්නේ අත ලෙවකන්න නොවේ නම් දේශපාලනය කරන්නේ ද දශක ගණනක් විපක්ෂ මන්ත්‍රී වරයෙක් ලෙස හිදීමට නොවීය.(වර්ශ 1994 සිට එනම් පුරා වසර 19ක් එ.ජා.ප ය සිටින්නේ විපක්ෂයේ ය) පුද්ගලයෙකු පාර්ලිමේන්තු මන්ත්‍රී ධූරයක් වෙනුවෙන් කරන සුවිසල් මුදල් ආයෝජනය වඩාත් පලදායක වන්නේ (හොද ප්‍රතිලාභයක් ලබාගත හැකි වන්නේ) ඇමති හෝ නියෝජ්‍ය අමති ධූරයක් දැරීමෙන් හෝ අවම වශයෙන් ආණ්ඩු පක්ශයේ මන්ත්‍රී වරයෙකු වීමෙන් පමණි.නීති සම්පාදකයෙක් ලෙස උත්තරීතර ව්‍යවස්ථාදායකය තුල ගරු මන්ත්‍රීතුමා ලෙස රැඳෙනවා හැර විපක්ෂ මන්ත්‍රී වරයෙකුට කල හැක්කේ කුමක්ද?අතීතයේ මෙන් ඉක්මනින් පාලක පක්ෂය මාරුවන්නේ නම් එලෙස විපක්ෂයට වී බකන් නිලාගෙන ඉන්නට වන්නෙ වසර 5 ක පමණ කාලයක් වුවද අද දයාසිරිලාට සිදුව ඇත්තේ අවසානය කවදා වේදැයි නොදන්නා දීර්ඝ කාලයක් විපක්ෂයේ රැඳී හුලං බීමටයි.දයාසිරි පමණක් නොව පිල් මාරු කල සියලු එ.ජා.ප මන්ත්‍රී වරුන්ගේ සැබෑ කතන්දරය මෙයයි (කරු ජයසූරිය මහතා මේ සූත්‍රයෙන් විතැන්වේ).

දයාසිරි පිල් මාරු කලා කියා හම්බන්තොට වරායේ කලුගල නැතිවන්නෙ නැත.මත්තල ගුවන් තොටට හෝ ගා ගුවන් යාන එන්නේ ද නැත.චීනෙන් ගත්තු ණය අහෝසි වන්නේ ද නැත.නොරච්චෝලේ බලාගාරයේ දෝශ නැතිවන්නේ ද නැත.දේශපාලකයන් පිලිබඳව ජනතාව තුල ඇති ජුගුප්සාජනක ප්‍රතිරූපය යලි තහවුරු කළ දයාසිරි ජයසේකර කතාවස්තුවේ ඉදිරි පිටුව ලිවීම කුරුණෑගල දිස්ත්‍රික් ඡන්දදායකයන්ට භාරය.

ගව ඝාතනය මින් පසු නවතිනු ඇත? – No more cattle slaughter?

මිනිසා යනු දේශපාලන සත්‍යවයෙක් යයි කියනු ලැබේ. එනම් ඔහු ගේ කුදුමහත් සෑම චර්යාවකටම බිදක් හෝ දේශපාලනය ගෑවී ඇත. අප රටේ සිටින මේ දේශපාලන සත්‍යවයා ද මේ යථාර්ථයෙන් නොගැලවේ.උතුම් වූ සම්බුද්ධ තෙමඟුල සිහිකරන වෙසක් පොහෝ දිනයේ ද, ශ්‍රීදළදා මාලිගාවේ ද, සමස්ථ බුද්ධ ශාසනයෙද ගෞරවය කෙලසමින් භික්ෂූණ් වහන්සේ නමක් පණ පිටින් ස්වයං ආදාහන පූජෝත්සවය පවත්වාගැනීම පිටුපස ඇත්තේ ද දේශපාලනයයි.අවාසනාවට කලෙක සිට මේ භූමිය අරක් ගෙන සිට්න ජරාජීර්න කුජීත දේශපාලනයයි.

අප රටේ දේශපාලනය කොටස් තුනකින් සමන්විත වේ.

1.දේශපාලන දර්ශනයක් මත පදනම් වූ දේශපාලනය

2.ආර්ථිකය මත පදනම් වූ දේශපාලනය

3.රට, ජාතිය, ආගම මත පදනම් වූ දේශපාලනය

මේ එක් එක් කොටස් වල ලක්ෂණයන් මදක් විමසා බලමු.

1.දේශපාලන දර්ශනයක් මත පදනම් වූ දේශපාලනය

තමන් නිවැරදි යයි විශ්වාස කරන දේශපාලන දර්ශනයක් වෙනුවෙන් කැපවී දේශපාලනයේ යෙදෙන කොටස මීට අයත් වේ.සමහර විට ඒ සමාජවාදය විය හැක.නැතහොත් ලිබරල්වාදය හෝ ධනවාදය හෝ විය හැක.නැතහොත් ඒ දෙකටම අයත් නොවන වෙනත් දර්ශනයක් විය හැක.කුමක් වුවද මෙවන් දේශපාලන දර්ශනයක් පිළබදව හැදෑරීමක් කොට ඇත්තේ ද, මේවායේ දාර්ශනික පදනම හදුනන්නේ ද, ඒවෙනුවෙන් කැපවී සිටින්නේ ද ජනගහණනයෙන් ඉතා කුඩා ප්‍රතිශතයක් පමණි. නව සමසමාජ පක්ෂය වැනි පක්ෂ ලෙස සංවිධානගතවී සිටින්නනේ ද ඒ පක්ෂ විසින් අමතන්නේ ද මේ කොටසය.

2.ආර්ථිකය මත පදනම් වූ දේශපාලනය

තමන් ගේ ආර්ථිකය වෙනුවෙන් දේශපාලනයේ යෙදෙන්නන් මීට අයත් වේ.සමහර විට රැකියාවක් වෙනුවෙන්, ජීවන වියදම අඩු කිරීම වෙනුවෙන්, ව්‍යාපාරික අවස්ථා ලබාගැනීම වෙනුවෙන් දේශපාලනයේ යෙදෙන්නන් ගෙන් මෙම කුලකය සමන්විතය.

3.රට,ජාතිය, ආගම මත පදනම් වූ දේශපාලනය

රට, ජාතිය,  ආගම ට සිදුවන කෙනෙහිලි නම් වලට එරෙහි දිවිහිමියෙන් සටන් වදින කීප දෙනෙක් ගෙන් හා රට, ජාතිය,  ආගම වෙනුවෙන් අන් සියලු දේ ඉවසන විශාල පිරිසකගෙන් මේ කුලකය සමන්විතය.හෙල උරුමය, ද්‍රවිඩ සංධානය, මුස්ලිම් කොන්ග්‍රසය වැනි දේශපාලන පක්ෂ අමතන්නේ මේ පිරිසයි.

අප රටේ පාලන බලය හිමි වන්නේ ඉහත දේශපාලනික සත්‍යවයන් තුන් කොටස නිසි ලෙස කළමනාකරනය කරගන්නා දේශපාලන කණ්ඩායමටය. අපේ රටෙස්වාභාවය නම් ඉහත 1 දරන කොටස සාපේක්ෂව ස්ථිතිකව පැවතීමත් රටේ අති විශාල බහුතර ජනතාව 2 හා 3 යන කොටස් අතර වරින් වර දෝලනය වෙමින් සිටීමත්ය.මැතිවරණ කාලසීමාවේ බහුතර ජනතාව ගොනුවී සිටින්නේ 2වන කොටස ද 3වන කොටස ද යන්න දැන ඒ අනුව මැතිවරණ ව්‍යාපාරය මෙහෙයවන කණ්ඩායම මැතිවරණ ජය ගැනීම පාලකයන් බවට පත්වීම මෙරට සාමානය සම්ප්‍රදායයි.සමහර විට ජන විඥානය තමන්ට වාසිදායක ලෙස හසුරුවාගෙන තමන්ට අවශ්‍ය කොටස වෙත ජනතාව ගාල් කිරීමේ ක්‍රෙමෝපාය ද සාර්ථකව ක්‍රියාත්මක කෙරේ.

ඇට අට, හාල් පොත, ජනසවිය, තුනයි පණහට පාන්, ආදිය අපේ ඉතිහාසය තුල වරින් වර අංක 2 කුලකය අමතා මැතිවරණ ජයගත් සෙන්පතියන් ලෙස දැකිවිය හැක.

සිංහලය රාජ්‍ය භාෂාව කිරීම, කොටින් විනාශ කිරීම, ධර්ම රාජ්‍යය ආදිය ආදිය අපේ ඉතිහාසය තුල වරින් වර අංක 3 කුලකය අමතා මැතිවරණ ජයගත් සෙන්පතියන් ලෙස දැකිවිය හැක.

මැතිවරණ හරහා බලය ලබාගැනීමට මෙන්ම ලබාගත් බලය ආරක්ෂා කිරීමට ද 2 හා 3 කොටස් අතර ජනතා දෝලනය හදුනාගැනිම වැදගත්ය.මෑත කාලීන උදාහරනයක් ගතහොත්, විදුලි බිල වැඩීවීම ද, ඒ හරහා සංවේදී වෙමින් (ස්වාභාවිකවම සිදුවූ 2වන කොටස වෙත  ජනතා ගොනුවීම ට) ජනතා විමුක්ති පෙරමුණ සංවිධානය කළ ජූනි 21 දා එක් දින වර්ජනය ද අංක 2 කුලකය වෙත ජනතාව ගොනු වූ අවස්ථාවකි.

මේ අභයෝගය ජයගැනීම පිණිස රජය උපක්‍රම දෙකක් අනුගමනය කළේය.

(I) අංක 2 කොටසට අවනත වෙමින් මැයි දිනය දා රාජ්‍ය නායකයා විදුලි බිල අඩු කල බවට කුඩා ඇස්බැන්දුමක් කිරීම.

(II)ඉහත පියවරේ සාර්ථකත්වයේ මද බව නිසා “වර්ජනය කරන්නේ රට අරාජක කිරීමට -වර්ජනය පිටුපස විදේශ කුමණ්ත්‍රනයක්” යන මතය සමාජගත කර අංක 3 කොටස වෙත ජනතාව ගොනුකිරීම.

සමහර විට සුද්දා මේ රටින් පිටවීමටත් පෙර සර්වජන චන්ද බලය මෙරටට ලැබුණ දාසිටම මෙහි ක්‍රියාත්මක වන්නනේ මේ සූත්‍රයයි.අවාසනාවට කාරණය නම් මේ ක්‍රියාදාමය තුල අසරණ ජනයා බොහෝ විට රැවටීමට ලක්වීමයි. අද හලාල්, කූරගල, උතුරට පලාත් සභා වැනි මාර්තෘකා වලින් කරන්නේ අංක3 වෙත ජනතාව ඇද බැද තබාගැනීමයි.

පොදුජනතාව පමණක් නොව දේශපාලන පක්ෂ හා කණ්ඩායම් ද 2 හා 3 කොටස් අතර වරින් වර සංක්‍රමණය වෙමින් බලය සොයා ක්‍රියාකාරී වෙති.

ගිණි තබාගත් භික්ෂූව මේ ලිස්සන සුලු දේශපාලන මාවතේ දරුණු ලෙස අනතුරට භාජනය වූ අවාසනාවන්ත පදිකයෙක් බව ලේඛකයා ගේ මතයයි.

භික්ෂූන්වහන්සේ නමක් ගිණිතබාගෙන අපමණ වේදනා විද අපවත් වූ පලියට ගව ඝාතනය නතර වන්නේ නැත, අන්‍යාගමීකරනය නතරවන්නේ ද නැත.සිදු වූයේ  නිශ්පල දෙයකට තමන් ලැබූ දුර්ලභ මිනිස් ජීවිතය නිකරුනේ නාස්ති වී යාම පමණකි.

 

දන්සැල් පාර්ටි – The Dansala or a party

Dansela

දානය උතුම් වූ පුණ්‍යකර්මයකි. දස පුණ්‍යක්‍රියා වල මුලටම එන්නේ ද දානයයි.

දාන, සීල, භාවනා, පත්තිදාන, පත්තානුමෝදනා, ධම්ම දේශනා ,ධම්ම සවන,වෙය්‍යාවච්ච, අපචායනය, දිට්ඨුජ කම්ම

එමෙන්ම පුද්ගලයෙකු ශ්‍රේෂ්ඨත්වයට පත්කරන පාරමිතාවන් අතරින් ද මුල් තැන හිමිව ඇත්තේ දානයටයි.

“දානං සීලංච නෙක්ඛම්මං

ප්‍රඥා වීර්යේන පාරමං

ඛන්ති සච්ච මධිට්ඨානං

මෙත්තු පෙක්ඛා ඉමේ දස“

පාරමිතා, උපපාරමිතා, පරමත්ත පාරමිතා ආදී වශයෙන් ඉදිරියට යන විට තමා සතු දේ පමණක් නොව ඇස්, ඉස්, මස්, ලේ මෙන්ම ජීවිතය පවා දන්දීම උතුම් ලෙස බෞද්ධයෝ පිලිගනිති.

 බුදුරජාණන් වහන්සේ විසින් රාජ්‍ය පාලකයන් විසින් තම යටත් වැසියන්ට සංග්‍රහ කල යුතු යයි අනුදැන වදාල පරිදි සතර සංග්‍රහ වස්තු වල ද මුලින් ම ඇත්තේ දානයයි.

1.දානය

2.ප්‍රිය වචනය

3.සමානාත්මතාව

4.අර්ථචර්යාව

මෙමගින් බුදු දහම තුල “දානය“ ට ලබාදී ඇති වැදගත්කම පැහැදිලිය.

සැබැවින් ම “දානය“ හෙවත් “දීම” යනු කුමක්ද? දානය යනු අන් කිසිවක් නොව අත හැරීමයි. සත්වයා සංසාරයට බැද තබන රැහැනක් වන තෘෂ්ණාව මැඬලා අලෝභ, අද්වේශ, අමෝහ යන කුසල් මුල් (සිතිවිලි) උපදවා ගැනීම දානයේ මූලික පරමාර්ථයයි. එලෙස දෙන දානයේ අනුහස් වැඩි බව බුදුන් වහන්සේ දේශනා කොට ඇත.

සියලුම දානය අතරින් ධර්ම දානය උතුම් බව බුදුන්වහණසේ දේශනා කොට ඇත.

“සබ්බ දානං දම්ම දානං ජිනාති“

දානය බුදුන් පිදීමේ ආමිශ පූජාවක් ලෙස වැදගත් වන්නේ, එය ප්‍රතිපත්ති පූජාව කෙරෙහි හුදී ජනා යොමුකරන පාලමක් වන බැවිණි.

දානය යනු අත්හැරීම නම් අප විසින් අත් හරින්නේ මොනවාද? අපවිසින් අත් හරින්නේ අප සතුව පවතින්නක් මිස කාගෙන් වත් ඉල්ලාගත් දෙයක් අප විසින් අත් හැරීමෙන් කුසල් ඉපදේද?

අද වෙසක් සමයේ අපේ ජනතාව දාන පාරමිතාව පුරන්නේ කෙලෙකද? මහාබත්, නූඩ්ල්ස්, සැන්ඩ්විච් පාන්, කොළ කැඳ, සිසිල්පැන්, මඤොක්කා, ආදී මෙකී නොකී දන්සැල් වෙසක් සමයේ පාරවල් පුරා දක්කට ලැබේ. මේවා සංවිධානය වන්නේ කෙසේද? සංවිධායකයෝ  ආධාර ලැයිස්තුවක් රැගෙන ගම වටා ඇවිදිති. ලැයිස්තුවේ මුලට ව්‍යාජ නම් වලට අතිවිශාල පරිත්‍යාගයන් ලියා පාරට බසින විට කාටවත් දෙවෙනි වීමට අකමැති අපේ ජනතාව ද එබදුම මුදලක් ඇත්තටම ලියා දන්සලට සම්මාදම් වේ. මේ සම්මාදම් මුදලින් කාගේ කාගේ සාක්කු පිරේ ද යන්න වෙනම ගැටලුවකි. අවසානයේ වෙසක් දා දන්සලට ආධාර කල පිරිසද ඇතුලුව කවදාවක්වත් තුන්වේල කෑමේ අර්බුදයක් නොතිබුණු ජනතාව “වෙසක් බලන“ ගමන් මේ දන්සල් “වන්දනා“ කරති.

මේ ක්‍රයාවලියේ මූලීක දෝශ දෙකකි.

1.දන්සල් දෙන්නා එය දෙන්නේ තමා සතු මුදලක් වියදම් කොට නොවේ

2.දන්සල බුක්තිවිදින්නේ කෑමට යමක් නැති (දන්සල් ඇත්තටම අවශ්‍ය) දුගීන් ද නොවේ

මේ ක්‍රියාවලිය තුල දානය යන්නේ සැබෑ පරමාර්ථය ඉටුවේ ද යන්න ගැටලුවකි. දානයක අනුහස් වැඩි වන්නේ, දායකයා ගේ චිත්ත පාර්ශුද්ධත්වය මත මිස ප්‍රමාණාත්මක වටිනාකම මත නොවේ. සැදැහැ සිත් දෙනු ලබන අල්ප වූ දෙයක වු වටිනාකම වැඩි බව බුදුන්වහන්සේ ගේ දේශනාවෙහි දැක්වේ. උතුම් වූ තෙමඟුල සැමරීමට සූදානම් වන මේ මොහොතේ දානයේ සැබෑ අරමුණු අරුත් ගන්වන ලෙස දන්සල් පවත්වන්නේ නම් කෙතරම් ශ්‍රේෂ්ඨ ද?

මෝහාන්ධකාරය දුරලා ප්‍රඥාවේ ආලෝකය ලොව දසත පැතිරේවා!

සුභ වෙසක් මංගල්‍යයක් වේවා!

විදුලි අර්බුදය, වෙනස් කියැවීමක් – Take a look by a different angle

විදුලි බිල වැඩිවීම ජනතාවට දරාගත නොහැක. ඒ ගැන වාදයක් නැත. වැඩි කල ආකාරය ජුගුප්සාජනකය (එකවර වැඩි නොකර ජනතා අදහස් විමසුවේ මොන ඇන්නෑවකටද?) නමුත් විදුලි මිල පිලිබඳව පුද්ගලිකව මවිසින් කල විස්තරාත්මක නොවන ලඝු විමර්ශනයකට අනුව පැහැදිලිවන්නේ විදුලි බිල වැඩිවීම රටේ සමස්ථ ආර්ථික අර්බුදයේ ම කොටසක් බවයි.සැබැවින් ම මාසික පරිභෝජනය ඒකක 90 ට අඩු පාර්භෝගිකයන් ගේ විදුලි ගාස්තුව විදුලි නිශ්පාදන පිරිවැයට සාපේක්ෂව එතරම් අසාධරණ ගාස්තුවක් නොවේ. අප රටේ සැබෑ අර්බුදය නම් එවන් සාධාරන මිලක් ගෙවීමට තරම් වත් ආර්ථික වශයෙන් සවිබල තත්වයක රටේ බහුතර ජනතාව නොසිටීමයි.

පහත වගුව දෙක දෙස අවධානය යොමු කරන්න. මෙහි සංශෝධිත විදුලි ගාස්තුව විදුලි පරිභෝජනය ඒකක 10 න් 10ට ගණනය කොට ඇත්තේ, ස්ථාවර ගාස්තුව හා ඉන්ධන ගැලපුම් ගාස්තුව ද එකතු කොටය.

 ElE per unit

දෙවන වගුවෙන් දැක්වෙන්නේ පර්භෝජන ඒකක ගනන අනුව පාරිභෝගිකයා ඒකකයකට ගෙවිය යුතු ගාස්තුව වෙනස් වන අන්දමය.

ElE per unit2

තෙවන වගුවෙන් ලංකා විදුලි බල මණ්ඩලය විදුලි ඒකකයක් මිලට ගන්නා මිල ගනන් දැක්වේ. එය ඒකකයකට රු 17 පමණ සිට 25 දක්වා පරාසයක විහිදේ.

ELE pay

සිව්වන වගුවෙන් විදුලි ඒකකයක නිපැයුම් පිරිවැය (යොදාගන්නා ක්‍රමය අනුව) දක්වා ඇත.ඇමරිකානු ඩොලරයක විනිමය අනුපාතය රු130 ලෙස ගෙන මේ වගුවේ අවසාන කොලම සකසා ඇත. ඒ අනුව විදුලි ඒකකයක නිපැයුම් පිරිවැය රු9 ත් 20ත් අතර වන බව පැහැදිලිය.(අධික පිරිවැයක් ඇති එනම් රු 31ක් දරන සූර්ය ශකිත්ය අමතක කොට දමමු). මේ නිපැයුම් පිරිවැයට වෙනත් උඩිස් වියදම් හා ලාභය ද එකතු විය යුතුය. වගු අංක 2 නැවත බලන්න. තවමත් අප රටේ ඒකක 90 ට අඩු මාසික පරිභෝජනයක් ඇති පාරිභෝගිකයන්ට විදුලිය ලබා දෙන්නේ නිපැයුම් පිරිවැයටත් වඩා අඩු මුදලකටය. එනම් පාඩුවටය. 

ElE per unit3

මූලාශ්‍රය, http://www.eia.gov/forecasts/aeo/electricity_generation.cfm

විදුලි බලය නිපදවන මිලට සාපේක්ෂ මිලකට එය මිලදී ගැනීමට නොහැකි ජනතාවක් වීම පිලිබඳව අප ද, අප එවන් තත්වයකට පත් කිරීම ගැන මෙහි පාලකයන් ද ලජ්ජා විය යුතුය.

නව අවුරුදු සුභපැතුම් – New year wishes !

2013 - sinhala NY2

අවිවේකය බ්ලොග් ලිවීමට දිගින් දිගටම භාදා කරයි. කාලීන මාර්තෘකා වලට සිතෙන් කටුගෑ ලිපි කීපයක් ම කල් ඉකුත් වී හමස් පෙට්ටියේ ය. කෙසේ වුවද බ්ලොග් ලිවීම කිසිසේත් ම අත් නොහරිමි. ඉක්මනින් ම අලුත් මාර්තෘකාවකින් මුණගැසෙමු. එතෙක් පිළිගන්න මේ පැතුම් !

ඇයි මීට කලින් මාව දැකල නැද්ද? – Haven’t you ever seen me before?

Malinga

ලසිත් මාලිංග වීරයකු කලේ ජනමාධ්‍යය යයි කීම, ජනමාධ්‍යයේ ස්වයං අධිතක්සේරුව පිලිබඳ කදිම නිදසුනකි. නලුවෙකු, ගායකයෙකු, හෝ සමහර විට දේශපාලකයෙකු, හෝ ජොතිර්වේදියෙකු සමාජයේ ඉහලට ඔසවා තැබීමේමී හැකියාවක් ජනමාධ්‍යය සතුව ඇතිමුත් ක්‍රීඩකයෙකු එලෙස ඉහලට එසවීමට ජනමාධ්‍යය සතු ශක්‍යතාව විවාදාපන්නය.මක්නිසාද  යත් ක්‍රිකට් හෝ මොනයම් ක්‍රීඩකයෙකු සමාජයේ ලබන ප්‍රතිරූපය තනිකරම පාහේ ඔහු ගේ කුසලතවය මත ගොඩනැගෙන්නක් බැවිනි. ලංකවේ ජාත්‍යන්තර මට්ටමේ ක්‍රකට් ක්‍රීඩකයින් විශල පිරිසක් (මින් අදහස් කරනුයී පුහුණු සංචිතය ද ඇතුලුව ය) සිටින මුත් ජනතව අතර වීරයන් බවට පත්ව සැලකුම් ලබන්නෙ ඉන් අත්ලොස්සක් පමණි. සනත්, අර්ජුන, මුරලි, සංගක්කාර, මහේල, එවැනි වීරයන් කීප දෙනෙකි. මාලිංග ද අයත්වන්නෙ එම කුලකයටයි. ඔහුගේ වීරත්වය පිටුපස තනිකරම ඇත්තේ ඔහුගේ කුසලතාවයයි. උදාහරණයක් ලෙස ලෝක කුසලන තරගවලියකදී පිටපිට පන්දු 4ක දී කඩුලු 4 දවාලමින් ඔහු පෑ අසාමාන්‍ය දක්ශතාවය ප්‍රේක්ෂක දෑස් වලින් සැඟවීමේ හැකියාවක් කිසිදු ජනමාධ්‍යයක් සතුව නැත.

ලසිත් මාලිංග මාධ්‍යයයට බැන වැදුන විට “ඔයාව ඔතෙන්ට ගෙනවෙ අපි, දැන්  වට්ටන් නම් හිටපු තැනටම” කියමින් වහසි බස් දෙඩීම පල රහිත වන්නෙ එබැවිනි.එදින මාලිංග ගේ හැසිරීම ක්‍රීඩකයෙකුට හෝ කිසිදු මහත්මයෙකුට නොගැලපෙන්නක් බවට තර්කයක් නැත. නමුත් මෙහිදී මාධ්‍යයයේ යී සිත් රිදුනා කියා මාලිංගට පාඩුවක් වීද? නැත. ඔහු හොදින් ක්‍රීඩා කරන තාක් මාධ්‍යයට ඔහුට එරෙහිව කලහැකි කිසිවක් නොමැත. මෙහි  මාලිංග සිටින තැනට ඔහු වෙනුවට ගායකයෙකු ආදේශ කරන්න. මාධ්‍යය සමග ගැටුමක් ඇතිකරගන්නා ගායකයෙකුට ප්‍රතිචාර ලෙස මාධ්‍යය එකටෙක කිරීමක් වශයෙන් ඔහුගෙ ගීත වාරණය කලේ යයි මොහොතකට සිතන්න. මෙයින් එම ගයකයාට සිදුවන බලපෑම කෙබඳු ද? සමහරවිට ඒ ඔහු ගේ විනාශයම විය හැක.

ක්‍රිකට් ක්‍රීඩකයෙකුට ජනමාධ්‍යය අවශ්‍යවේ නම්  අවශ්‍ය වන්නෙ ඔහු ජාතික කණ්ඩයමෙන් පිටත සිටින විටෙක ජාතික කණ්ඩායමට ඇතුලත් වීම සදහා බලධාරින් ගේ දෑස් ඔහු වෙත යොමු කරවීමටය. මාලිංග ජාතික කණ්ඩායමේ ස්ථාවරව සිටින නිසා ඔහු මේ අවදිය පසු කොට ඇති බව පැහැදිලිය.අඩු කුසලතාව නිස කණ්ඩායමෙන් ඉවතට විසි වී සිටින කලෙක නැවත කණ්ඩායම තුලට ඇතුල් වීම සදහා නම් මාධ්‍යයට යම් තීරණාත්මක වැඩ කොටසක් කල හැකි නමුත්, බලධාරීන් ක්‍රියාකරන්නෙ මාධ්‍යයට හෝ ජනතාවට අවශ්‍ය පරිදි නොව වෙනයම් න්‍යාය පත්‍රයකට අනුව බව මෑත කාලීන උදාහරණ රැසකින් පෙන්විය හැක.මාධ්‍යය හා ක්‍රීඩකයන් අතර අනෙක් සම්බන්ධය නම් වෙලඳ ප්‍රචාරක දැන්වීම්ය. මෙය ද ක්‍රීඩකයාගේ කුසලතාව හ වෙලෙන්දාගේ මුදල් මත පවතින ගනුගෙනුවක් බැවින් මාධ්‍යයට කල හැකි බලපෑම ශුන්‍යය.

එසේ නම් මාලිංග (හෝ ඕනීම ක්‍රීඩකයෙකූ ) හොදින් ක්‍රීඩා කරන තාක් ඔහුගෙ ප්‍රතිරූපය බිද වැට්ටවීමට මාධ්‍යයයට කලහැකිදේ සීමිත බව පැහැලිය.

නමුත් මොන තරමී වීරයෙකු වුවද මාධ්‍යය සහ ජනතාව ඉදිරියේ හැසිරීමට නොදන්නේ නම් ඒ ඔහුගේ නොහැදියාව මිස අන් කිසිවක් නොවන බව ද සටහන් කලයුතුය.